豪語錄
為所欲為 陳奕迅
在酒店大堂等候，鋼琴彈奏着《歲月如歌》，幾應景。廿分鐘後，我坐不住了，又輪到《最佳損友》，依稀之前還傳來《富士山下》——是雄霸武林到咁還是琴師知道 Eason光臨？但應該非關擦鞋，在香港，搞音樂的人對陳奕迅都有點想法，或支持或妒忌或羨慕，總之無法無想法。
樂隊 Mr.有首《如果我是陳奕迅》，你未必聽過（若人人聽過 Mr.早變陳奕迅了），歌詞中愛恨交纏恕不一一引錄，主旨其實環繞：如果我係呢條友，咁就乜都得
陳奕迅有幾乜都得，我亦不逐項由 show量銷量資產量詳述了，已不單只紅，一件事反映晒：他是唯一毋須節食操肌，而夠膽死赤膊登台的歌手。
肥陳這天笑笑口：「因為我沒計算，沒六嚿腹肌那種意料之內的驚喜，我係直頭令到大家吓，呆咗。」
題為《為所欲為》，幾鬼似他的歌名（當然不是），一如《天下無雙》、《無人之境》，口啓霸氣，拆穿了卻簡單而不容易——「做自己喜歡做的事。」陳奕迅說。
我都想係陳奕迅。
最後防線
唱片公司 email來新大碟文案，說什麼「睽違兩年」，從主題到每首歌的概念描述得感天動地。當事人坐在總統套房邊吃着燒肉邊笑說：「邊有咁多道理吖。」這才貼近現實，現實是，做 show已夠好賺，唱片疏得事隔兩年還需要理由嗎？
陳：早在○三年我就諗過唔再出，銷量跌咗，我驚人家蝕錢，反正我夠歌做 live singer，舊歌重編重唱也夠玩。然後，自己士氣起起跌跌，有時耷耷哋，有時勢頭不錯又想做多啲。
壹：因為大家睇你頭，連陳奕迅都出唔少，可見業界幾難捱。
陳：我曾經以為是履行對公司責任，但原來不是；又曾經自覺身為本地唱片的最後防線，原來亦不是。我只是真係鍾意做。
我喜歡台灣宣傳人員，他們會互相鼓勵：「環境不好，更加要加油！」香港文化慣咗講反話：「係咁㗎啦。」這種激將法行咗咁多年，不如轉轉——我係「娘」，但不怕「娘」，大家加油！
朋友都錫我， Eric Kwok（作曲人）未開碟便留定歌給我揀。
壹：像阿徐（陳妻徐濠縈是時裝精）問 Dior：「點解唔番番條裙俾我？」
陳：哈，你扮她的聲氣不似，但比喻得好好。
壹：今時今日，陳奕迅真係乜都得。
陳：我成日聽到呢句，我明你意思。李克勤同我講：「係你先得。」我話：「你都得，你唔試啫。」佢話：「唔係，係你先得。」再說下去，像飲茶爭埋單咁。
點解我得？因為我冇諗過後果。有人說，唯一解釋，是前世我做落很多好事。
壹：包括夠膽死冇操肌就台上除衫？
陳：熱係真嘅，底蘊是那刻我想扮黃家駒，攞住結他好型，唔做，下次未必有機會。
為什麼樂壇式微？因為太多無關的新聞，開 show就例牌事先張揚點減肥。我去內地巡迴，記者問：「會怎配合我們城市的特色？」我話：「我未熟悉這城市有咩特色喎。」原汁原味地堅持也很好啫，但總之冇乜人問我音樂。
大屋種葱
關於音樂，我和陳奕迅主要匿埋廁所（總統套房廁所夠大）邊煲煙邊傾，正式訪問時自動 skip，陳奕迅諒解地說：「至少，你見證我有談過。」
壹：講開減肥——你睇我個樣幾八卦——徐濠縈說，你唔減肥戒煙就唔幫你生仔。
陳：我甚少留意娛樂新聞內容，只睇圖。係老豆（陳裘大）話番俾我聽，即晚我問老婆，她說：「唔知同記者講乜，就講呢啲，原本不是重點，寫出來變成重點。」
如果我要「強硬」地爭取再下一城，我可以很「強硬」的，但心態順其自然，女兒多個弟妹互相照應總是好事。
減肥係老婆為我好，很多病四十歲便嚟料，而佢又咁 fit， keep fit便應該多吃屋企飯。
壹：很少談家事，是不喜歡提，抑或根本參與得不多？
陳：並非埋怨，但我做不到正常家長，每次學校活動，我要問去唔去得㗎，怕 draw了人家 attention。個女小時候會介意我少接送她；大個了，她喜歡與同學出出入入，她們不想因為我而入鏡。
有次在將軍澳（女兒學校曾遷往該區）我發𤷪𤺧，只因為那天冇戴帽，髮型被大風吹成一九界，被記者影到，唔靚嘛。
壹：除了唱歌，買樓算不算最大嗜好？
陳：是被放大咗嚟寫，尤其唔鍾意睇樓，大家睇住我點入市，周街經紀派咭片給我，我又乜都 keep嘅。
件事大，因為金額大，咁，辛苦咗咁多年，貴貴都要有個安樂窩啫。手機時代，坐商務艙都被影到瞓覺樣，唯有屋企是私人空間。最緊要廚房大，招呼朋友食飯，種埋葱仲正，煮煮吓唔夠葱即刻摘。
舐碟底
「乜都得」的陳奕迅，同時有很多「乜都唔得」，包括上述的接放學、睇樓，以至……
壹：近期最大變動是換了經理人？
陳：與 Katie（舊經理人陳家瑛）合作時自己仲細，她叫我做決定，但基於似阿媽角色，好自然聽晒佢話。 Lisa（新經理人甘菁菁）就似家姐多啲，有商有量一齊研究。現時我的演唱會仍歸 Katie搞，其他由 Lisa去開展。
壹：演唱會太好賺了，莫講唱片，電影等其他項目更少兼顧到，算不算遺憾？
陳：未至於遺憾，遺憾要留給生命結算。我咁扮嘢，怎會不愛演戲？但正如張家輝同我講：「唔好撈過界啦。」
我希望做好各方面，記招也舐碟底——我一定最遲走，盡量表達清楚。潮流興炒大圍，有次見陳慧琳上電視，我數過，一共四十幾個咪牌，成串頸鏈咁圍住塊面，著咩衫都睇唔到——點解唔 selective啲、做好啲？
裙下 Eason
陳奕迅是否認叻自大？應該不是。他說：「有 fans話聽咗我首《今日》考四次會考終於合格。『抬頭吧，相信愛你便能飛……』」他真影響了一代人，忍不住和他對唱。
壹：你的歌對我最勵志的是《裙下之臣》。
陳：吓？
壹：「熱血在騰問哪裡有人一生只愛一個女人」「理智制止我衝動地行近」，同為有家室的男人，你會明白，諗吓好嘞，唔好嚟真，歌詞警惕到我。
陳：又係喎。音樂可以幫手發洩，不一定肉體發洩，精神發洩更重要，諗完便冇事。所以我好怕娛樂新聞所謂揭露真相，真相不一定是 ABC……
壹：即係 A餐定 B餐？嗱，你講先㗎咋。
陳：那件事（指專欄作家葉朗晴拿徐濠縈和謝安琪比較），我在餐廳廁所遇過葉朗晴，他問我：「 You are Eason Chan?」我見他講英文怪怪哋，便有戒心地用英文回敬：「 Yes, may be.」寫出來卻話我飲醉酒講「 yeah baby.」其實，是他醉了聽錯，哪有真相可言？
If I were not
訪問陳奕迅有點壓力， Eason時而「吹神」時而自閉，參閱本刊《吟一吟》紀錄，他往往與街坊途人談得更投契。今次會否淡如水？按此推斷，這天，我寧願自己唔係記者。
「我同街坊途人傾的都是閒偈，講吓打羽毛球，你交唔到差嘅。」
對，如果我不是記者則訪問精彩——命題之邏輯謬誤在於，一旦訪問開始，身份便是記者了。英語句法 If I were not，假設性的事，要靠過去式和眾數式。
例如我問：「如果你不是陳奕迅，最想做什麼？」他答：「最想起間屋。」
出於記者本能，我首先諗起當事人深受供豪宅壓力，遂自給自足，甚至索性進軍地產界。陳奕迅聽到笑出眼淚。
其次諗起明星捐建希望小學之類。陳奕迅認真道：「咁反而容易，亦是應該的。但我想嘅係落手落腳同朋友在偏遠地方砌磚批盪，自己會得到啟發，也啟發到人。」
這便要回歸過去式（想像不做歌手的他其實幾似地盤佬）和融入眾數式，而群眾會告訴陳奕迅：唱支歌籌款實際啲。
|
鍾意就快D Share啦！
|
|
|