20歲拍全裸寫真走紅 旺夫人妻菅野美穗就生啦！ [忽然1周 - 1038] 菅野美穗,MW,

菅野跟堺雅人婚後，生活低調，但依然高踞日本好感度排行榜前幾名，人氣與實力不容小覷。

亞熱帶

20歲拍全裸寫真走紅　旺夫人妻菅野美穗就生

被譽為「氣質女星」嘅菅野美穗，入行時走清純路線，但喺 20歲時，卻突然拍咗一輯全裸寫真集《 NUDITY》，即時轟動日本藝能界。而菅野則憑呢輯寫真集人氣急升，先後擔任驚慄片《富江》、《催眠》嘅女主角，亦憑《大奧》和《工作狂人》榮升日劇天后。

13年，菅野跟堺雅人合拍電影《大奧—永遠》撻着，拍拖 3個月即閃婚。勢估唔到菅野原來有旺夫命，婚後冇耐，本來只屬於二線嘅堺雅人竟憑神劇《半澤直樹》成為熱爆藝人，美穗腳頭好到呢﹗目前，呢位旺夫人妻，專心靜養安胎。真係可喜可賀﹗

話說菅野同堺雅人由傳出交往到閃婚，一直冇乜人睇好，事關當年嘅堺雅人，不單人氣冇乜，加上態度傲慢，所以日本傳媒對佢嘅評價好低。但自從跟人氣和事業成績都比佢高出幾倍嘅菅野交往後，堺雅人喺藝能界地位已有提升，之後再更憑《半澤直樹》打低木村拓哉成為日劇天王，菅野美穗即被公認有「旺夫命」。

對於 38歲嘅菅野美穗嚟講， 93年出道以來，先後演出過電視劇《變身》、《愛之歌》，及電視版《失樂園》，以新人嚟講，已經好旺。但諗唔到喺 98年，菅野 20歲生日當天，唔聲唔聲推出一輯超大膽全裸寫真集，令整個藝能界引起哄動。奇怪係菅野嘅演藝事業不單冇被寫真集拖垮，反而人氣急升，事業發展得更好。

菅野美穗寫真集《 NUDITY》，銷量大賣 80萬本，僅次於宮澤里惠嘅《 Santa Fe》 165萬本。兩人寫真集銷量至今仍未有人能打破。

堺雅人當年演出電影《大奧——永遠》時，仍屬二線，故當傳出跟女主角菅野美穗交往時，曾被嘲笑為「癩蛤蟆吃天鵝肉」。

可惜針無兩頭利，事業好、愛情卻冇乜。 98年，菅野跟稻垣吾郎因合拍劇集《美酒貴公子》撻着，之後兩人分分合合，拖拉咗 15年正式分手。未及一年，即閃嫁堺雅人。婚後嘅菅野一直冇再拍劇，只係接拍廣告。而堺雅人呢，話菅野旺夫又真係唔到你唔信，除今季新劇《 Dr.倫太郎》繼續打低木村嘅《 I’ M HOME》外，遲吓又開拍 2016年度大河劇《真田丸》，非常充實。不過呢啲都比不上迎接一個新生命來臨更重要、更開心。

菅野婚後盡量減產，但依然唔少工作搵上門。去年尾，菅野就為迪士尼動畫片《大英雄聯盟》配音。

安心待產嘅菅野，早前被雜誌拍到和朋友逛街，菅野一臉將為人母嘅喜悅。

自 2011年開始，菅野就成為化妝品 Sofina專屬模特兒，最近此廣告更出現於香港嘅電視。

堺雅人同菅野美穗夫妻習慣低調。舊年 10月，堺雅人 41歲生日當天，兩人被拍到喺超市買餸返歸煮飯仔慶祝，夠晒溫馨。

42歲嘅堺雅人同 38歲嘅菅野美穗，結婚兩年，終於造人成功。再過三個月左右，兩人便升格為人父母，開心之情溢於言表。

菅野美穗坎坷情史

1997年：跟柏原崇合作劇集《一吻定情》公開交往，更被稱「金童玉女」，可惜因菅野拍全裸寫真嚇走柏原崇。

1998年：與拍攝寫真集嘅攝影師宮澤正明傳出曖昧關係。

1998年：與稻垣吾郎拍《美酒貴公子》開始交往，直到 2008年分手。

2010年：跟玉木宏合作拍《不結婚的女人》而傳出緋聞。

2011年：與稻垣吾郎復合

2012年：再與稻垣吾郎分手

2013年：跟堺雅人交往 3個月即結婚

鍾意就快D Share啦！

下一篇 》