Samuel對工場的運作熟悉，雖然平日甚少機會親自下廚，但他會監察蛋糕的軟熟度，確保每個蛋糕的品質。
壹盤生意
成功「非」父幹 餅店月賺 30萬
一般人睇富二代，有錢有父蔭，毋須努力，生意成功是常識吧！但凱施餅店的太子爺 Samuel，卻想證明「終點線」仍然須靠自己努力。
Samuel父親經營的凱施餅店，全港九新界有五十八家分店。想搞半熟蛋糕的他，得到父親應允，租用其廠房整餅，又實行在凱施餅店寄賣；其他的，便得靠自己。 Samuel親自到日本找師傅，又揸車一手一腳送貨，方便與客人交流，兼且諗計推廣。現時「半熟工房」讓他月賺三十萬元，可以向老父交代。
半熟蛋糕，並不是指半生熟，而是指軟熟適中的口感。半熟工房的半熟蛋糕，採用法國牛油、北海道芝士、日本麵粉、以及蛋和奶等食材，以機器攪拌製成麵糊，倒在已做好的海綿蛋糕上，再加以焗製而成。「叫它做芝士梳乎厘，可能更貼切！」 Samuel笑說。
未創辦半熟工房前， Samuel幫爸爸管理凱施餅店六年，做的是傳統西餅；計糧、設計新產品、叫貨、討價還價都試過。現時 Samuel最有滿足感：「以前間鋪有好多嘢都要問爸爸，現在好多嘢都係我自己話事。」自主度大，壓力自然增加。 Samuel坦言，香港人喜歡吃芝士蛋糕，加上半熟蛋糕是新產品，相信經營一兩年亦非難事，但在品牌的持續性上卻有難度。「香港人喜歡新鮮感。我會定期推出新口味，例如綠茶、黑糖栗子，但只會係期間限定，唔會長期賣。」他希望利用多變和創新吸引人。事實除了工場地點及寄賣點外， Samuel從度橋、入貨、運輸，通通自己搞掂。
入貨：拖老豆落水
未搞半熟工房前， Samuel已經常到日本選購食材，觀摩日本餅店運作和試食各種日式蛋糕。他說：「當時食咗個半熟芝士蛋糕，第一反應係：『嘩，咁好味嘅』。」故萌生將此帶回香港的念頭。 Samuel即時帶多件回香港給爸爸「試味」，他說：「爸爸都講咗句，好正喎！」
在台灣朋友幫忙下， Samuel找到一位日本師傅，願意傳授製作秘笈。 Samuel即到日本取經，後來更「識做地」帶同爸爸一同前往日本致謝，他說：「禮貌上，日本人教你嘢，你帶長輩去見吓面，俾到佢一種受尊重嘅感覺。」取得師傅信任後， Samuel既可參觀工場，又獲傳授蛋糕配方，對方甚至幫他訂製一模一樣的機器去製作半熟蛋糕。
「我哋將日本成套搬過嚟，連包裝紙都接近一樣。甚至蛋糕的圍邊紙，都係日本訂造。」 Samuel指，不少食材都由日本進口，但他亦按香港情況有所調整。由於日本人喜歡甜食，不少甜品糖分較高，他知香港人「食唔慣咁甜」，所以半熟蛋糕的口感與日本類近，但甜度和芝士的味道則重新調校。「有啲人好固執，一定要做番正宗，但我話香港人唔接受你嘅味道，就係唔接受。」
定價：走高檔路線
半熟工房現時在十四間凱施分店，及凱施的副線「麵包秀」租用櫥櫃，每月象徵式繳付一萬元租金。當初創業時， Samuel未敢太心雄，忍手只在灣仔的麵包秀寄賣。他說，當初選址麵包秀，是由於它主力製作手感麵包，定價較凱施一般的麵包貴。「呢度嘅客路與凱施的不一樣，對客人而言，一件蛋糕十五蚊，不算貴，較易接受。」
開業初期，半熟蛋糕只售十二蚊一件，可以單買，純粹「試水溫」。「呢個優惠做咗大半年，最高峰時試過一日賣八百件。」後來，價格調整至十五元，銷量微跌。但隨着開拓其他寄賣試點成功，銷情回復穩定。現時半熟工房一日生產一千八百件半熟蛋糕，寄賣點也增至十五間。 Samuel更有意在九月開設半熟工房的旗艦店，現時正物色鋪位，屬意尖沙咀。
待客：親自送貨
Samuel說：「以前喺凱施做開生日蛋糕，無人會朝早買，但呢個（半熟蛋糕）朝早都有唔少人買，中午有時都多，真係捉摸唔到。」有一次，中環店在到貨後一個鐘沽清，叫 Samuel補貨。「我唯有開車過去，沿路睇埋灣仔區，無貨就補。想去多啲區但唔得，我揸私家車㗎咋！」雖然頻撲，但 Samuel提起時仍忍不住開心微笑。
除工場的六位師傅外， Samuel現時無聘請其他員工，他邀請一位好友 KK幫手處理市場推廣。 KK曾從事婚禮統籌，與不少藝人合作過，正好有利廣告宣傳。他曾邀請不同藝人試食，吳若希、龔嘉欣、趙碩之都是半熟蛋糕粉絲。 KK指，藝人在 facebook或 instagram打卡，自然增加產品曝光度。
半熟工房又特設 WhatsApp落單，由 Samuel和 KK親自處理，每天電話都響個不停。 KK說，雖然處理訂單辛苦，但珍惜每一個與客人溝通的機會。此外，他們設有送貨服務，購滿八百元便能送貨，二人又會變身「柴可夫」，將半熟蛋糕送到客人手上。 Samuel說：「自己的品牌，想自己一手一腳去建立，每一個部分都有關係。如果送貨的服務差，會影響個客對我們的信心。」 KK接着說：「好老土講句，以客為先，雖然佢哋（客人）唔知我哋係邊個，但我哋親自做，可控制好時間及送貨質素。」
未來發展
隨着半熟工房業務擴展，單靠二人揸私家車送貨已十分吃力。 Samuel和 KK表示有考慮找運輸公司送貨，目前仍在測試階段。 KK說：「我哋會做神秘顧客，私底下 order送去自己屋企，試吓服務態度和送貨時間。」 Samuel則指，開業以來，爸爸對半熟工房沒有太多意見，但老父影響他最深的，是如何選購食材。「食材要最優質嘅！你可以唔做宣傳，但食材方面一定唔可以慳。」他稱，若食材出問題，公司形象會受影響，所以寧願貴價，都不應犧牲食物的質素。對蛋糕要求嚴格，但 Samuel笑稱：「其實爸爸唔太鍾意食蛋糕，佢比較鍾意食麵包！」
開業資料
機器：$150萬
廣告：$10萬
入貨：$30萬
人工：$10萬
寄賣費：$1萬
雜費：$10萬
總投資：$211萬
*15間鋪，每間 1萬#6位員工
營業資料（ 6/2015）
營業額：$80萬
寄賣費*：$15萬
人工#：$10萬
食材：$12萬
雜費：$10萬
廣告費：$1萬
盈利：$32萬
一點意見
坊間有不少餅店售賣半熟蛋糕，成行成市。 Samuel曾對記者說：「日本好注重衞生，所以日本的半熟蛋糕，其實都係全熟，雞蛋唔熟有機會有菌㗎。」對此說法，諾亞半熟蛋糕的 Cathy反駁指：「坊間不少食品都並非全熟，如流心蛋、溫泉蛋，都是半生熟狀態。雞蛋是否有菌，要視乎雞蛋的質素和保存方法。」她續說：「我哋半熟蛋糕每日新鮮做，放-10℃以上嘅雪櫃。客人取走時有乾冰，有信心係市面做得最好嘅保存方法！」
作為「前輩」， Cathy對半熟工房有以下意見：
1.以寄賣形式售賣蛋糕，難取得消費者信心，最好改成美觀的專櫃吸引顧客，增加品牌效應。
2.大時大節，禮盒裝（ 5件或 10件裝）會較受歡迎，但平日以大的圓形蛋糕更吸引。件裝蛋糕容易被消費者計算每件價錢，減低吸引力。
3.日韓台的半熟蛋糕均以流心效果熱賣，建議日後可推出更流心的口味，迎合半熟蛋糕熱潮。
|
鍾意就快D Share啦！
|
|
|
