掃呢頁CODE去手機

2015年7月23日 星期四

黎瑞恩胰臟生腫瘤:每日都當係最後一日 黎瑞恩,





其他影片:>>






現年41歲嘅黎瑞恩(小恩子)前年爆出老公曾智明有個內地密友,令小恩子帶埋仔女搬走兼搞離婚,失婚嘅小恩子日日爆喊,仲試過睇臨床心理醫生,好在得老死劉小慧點醒佢,後嚟仲同前夫和解,點知解開咗個心結,今日有周刊指,小恩子發現自己嘅胰臟生咗兩個腫瘤,唔可以割除,亦唔可以食藥,令小恩子更加睇得開啲!

據周刊報道指,小恩子發現前夫喺內地有女性密友後,即嬲爆帶埋仔女離開,當時確係覺得自己係「全宇宙最慘」,小恩子喺報道中表示:「當時成日問點解,我做錯咗啲咩?我有乜唔好?婚姻底線衝破咗當然唔可以再一齊,但十幾年感情唔明點解搞成咁。所以有時諗起會好嬲,但火起完又諗吓,佢(前夫)其實唔係咁差,思想好撕裂。」本來佢都以為離咗婚,自己就冇事,點知一到夜晚喺度喊,望住一對仔女,佢又會喊,最後決定去睇心理醫生,醫生稱小恩子有啲抑鬱,建議佢食藥,不過,小恩子就想靠自己調節,唔想依賴藥物。

周刊又指,小恩子諗通咗之後,今年5月做咗次身體檢查,因為有時周身骨痛,個心又好抽搐,食嘢佢都好似吞唔到咁,起初小恩子以前自己生瘜肉,原來胰臟生咗兩個良性嘅1.5cm腫瘤,不過,醫生表示:「好難搞,割又唔得,因為黐住晒好多嘢。」醫生叫佢要開心啲,目前每三個月就要去check下,小恩子知道生腫瘤後,佢反應出奇平靜,仲全程冇喊,小恩子覺得係個天叫佢要注意身體,認為「要死就死,驚乜嘢丫?注定咗就冇得講!」但係,小恩子就冇講畀佢啲小朋友聽,覺得係小毛病,或者過一排會冇咗。

小恩子認為,目前照顧自己情緒比控制病情更重要,所以小恩子一直堅持要開心,o依家睇嘢睇得開咗,小恩子覺得:「每日都當係最後一日,咁就唔會有遺憾,會過得開開心心。」

鍾意就快D Share啦!