2015年7月23日 星期四

望夫石 結婚 13年 森美遇 fans甩老婆 [壹週刊 - 1324] 森美,M1,



同老公一齊時, Veronica明顯心情開朗。

探熱針

望夫石 結婚 13年 森美遇 fans甩老婆

今年四十一歲的森美,由電台 DJ,撈到變金牌主持,仲踩埋入電視電影圈。愈撈愈掂,但結婚十三年的他,大仔十三歲,細女都有八歲,今時今日森美對家事依然保持低調,極少提及身邊人。日前,本刊發現森美同老婆 Veronica,以及一對仔女逛又一城,難得一家四口家庭樂,其間卻遇到少女粉絲要求合照,森美即甩開老婆,三仔乸唯有扮路人行開一邊,唔阻老公招呼「米飯班主」。

借老婆過橋

與錢嘉樂主持大台全新遊戲節目《超強選擇一分鐘》的森美,一直以牙擦擦形象入屋,卻出奇地擁有大班師奶、少女粉絲,老嫩通殺,促成本來已婚的他,更大條道理將家人低調,絕少提及身邊人。

「入行做 DJ冇耐,森美好快走紅,○四年簽俾 Paco,開始多元化發展,同老婆已經有協議,將私生活低調,所以佢好少提屋企人!」知情人說。

到一二年底,森美與陳敏之合作電視劇《法網狙擊》期間,因拍攝女星長腿照放上社交網,被指有「戀足癖」,他才破例高調拖老婆行街,以擁有健康家庭為由,撇清自己的變態行為。但事件平息後,老婆仔女又再次變隱形。

上週二(七月十四日),森美難得無工開,同老婆帶埋對仔女逛又一城,不經不覺,大仔已經十三歲,兒子遺傳了森美的厚唇,個樣似足老豆,就連行路姿勢亦如出一轍;至於八歲女兒,就似足媽咪,跟 Veronica做童星時個樣一模一樣。

一家四口逛完傢俬鋪,轉戰樓上的 The North Face睇衫,森美親自幫囝囝揀 T恤,同老婆有商有量。雖然生咗兩個,但 Veronica仍保養得宜,身形纖瘦的她,打扮亦頗新潮。

一家四口開心行街, 13歲兒子樣貌似足森美,還學埋爹哋雙手插袋。

Veronica發𤷪𤺧,叫只顧在玩具反斗城門外踱步的細妹去搵哥哥。

老婆幫女兒揀衫,森美亦有俾意見。

甩開老婆

睇完衫行出門口,突然有五、六個少女 fans大嗌森美,說時遲那時快,森美已甩開繑住自己的老婆,同班 fans影合照,已見慣類似場面的 Veronica,馬上帶兩個仔女行開,阿仔自己一個四圍行, Veronica就吩咐囡囡自己行玩具反斗城。被老公「拋棄」, Veronica獨自一個人踱步,一臉愁容的她遲遲唔見老公出現,一度企在扶手電梯旁往下望。

變望夫石,半小時後森美依然無影,最後 Veronica無癮地帶住對仔女,往停車場方向離開。

步出時裝店,森美被粉絲認出,他識做跟眾人合照。

森美掛住氹粉絲,帶住仔女避到遠處的 Veronica,明顯無晒心機。

委屈老婆

森美老婆 Veronica陳雅嫻,童星出身, 84年曾與許冠傑、甄妮合作電影《全家福》,到長大後任職商台,與森美認識,至 02年結婚。但同一時間,森美事業如日方中,與小儀合作的節目大受年輕人歡迎, 04年簽約 Paco的金牌娛樂,電影、電視、主持多線發展,為保事業及形象,森美絕少提及家人。

三年前,森美與長腿陳敏之合作拍劇,即被揭有「戀足癖」。

鍾意就快D Share啦!