熱爆娛樂: Alvin Goh　魔術手傳奇 [忽然1周

2015年7月31日星期五

Alvin Goh　魔術手傳奇 [忽然1周 - 1044] Alvin Goh,吳吉倫,MW,

名人潮

Alvin Goh　魔術手傳奇

每個成功人士的奮鬥路都有所不同，有人靠實力，默默耕耘，捱到金睛火眼，才能穩坐應得位置；有人擁有特強適應力，左閃右閃，好容易就安全過半生；有的注定勞碌一世，都只得個做字。

來自新加坡的星級形象總監 Alvin Goh（吳吉倫），由化妝師做起，拼搏多年，轉型為藝人做形象設計，誤打誤撞，用 cold call方式搵客，成功與日本天后濱崎步合作。自此為不少巨星改頭換面，成為造型界紅人。

講到尾，有時候運氣比起實力，更易得到一條直路！

步姐密友

Alvin兩年前認識濱崎步，一拍即合，之後成為對方御用形象總監。提起步姐，他指最難忘是她一句說話︰「有次佢凌晨打俾我，話我係佢全世界最信任嘅兩個人之一，一個係佢老公，另一個就係我。」

「我叫濱崎步除衫，佢即刻除。」 Alvin Goh（吳吉倫）一句說話，大概想說明，他與濱崎步的關係有多密切。能夠成為星級形象總監，風光背後，得來不易。當年他由新加坡來港扎根搵食，全靠揸緊宗旨，由頭到尾自己一手包辦，謝絕參考資料。他自信地說︰「我同其他 artist做嘢嘅時候，唔鍾意靠 reference，係比較奇怪啲，平時啲造型師或者 art director做嘢，佢哋都會有大把 reference。我做嘢唔使，原因係成日 copy啲 reference，咁呢啲唔係 original嘅嘢。我個原則係肯定要創新，唔想用偷懶方法， creative嘅人唔應該咁做。」

誤打誤撞識步姐

Alvin靠自己雙手打出名堂，之後加上運氣，走出康莊大道。他能夠與國際級 A-list藝人合作，應該由日本天后濱崎步講起。娛樂圈講人脈，有幸成為天后御用形象總監，以為他曾過五關斬六將，點知只由一個 cold call結緣，「其實我同 Ayumi（濱崎步）識咗兩年，時間好短，只不過我哋有種特別嘅友誼、好多默契。好多人以為我哋識好耐，當年我只不過係 cold call搵佢，幫佢影個雜誌封面，佢竟然應承我。第一次合作嗰日，我哋影 8個造型，去到第 3個，佢已經拍我膊頭，原來我哋追求嘅嘢好接近。」有了第一次， Alvin跟濱崎步合作無間，繼續為對方的巡迴演唱會設計造型。

性感戰衣

最近 Alvin為濱崎步新歌〈 Sayonara〉 MV擔任形象總監，為她設計一套華麗閃爍服裝，貼身 Corset逼出 4吋事業線，相當惹火。

濱崎步手上的面具，出自麥當娜御用設計師親手打造。

奀星大牌難合作

榮登國際級形象總監， Alvin曾與荷里活明星楊紫瓊、泰達史雲頓（ Tilda Swinton）及美娜祖維華芝（ Milla Jovovich）合作，儲下不少猛人客仔。「喺每個藝人身上，都會學到佢哋成功態度。同濱崎步識咗兩年，喺我心目中佢係一個 Diva（巨星），一個好勤力嘅藝人。佢會親自覆你電郵，好多嘢佢自己親力親為，呢個係佢成功嘅原因。」除了與步姐投緣， Alvin亦難忘與奧瑪花曼（ Uma Thurman）行女人街，傾心事。

再難搞嘅巨星都見過，不過 Alvin對自以為巨星的藝人，就耍手擰頭，講到明合作多一次都嫌多，「我識 handle啲麻煩人，有啲明星唔係有神經病，點會演戲演得咁好。反而有幾個係 local，做完之後我話千祈唔好再搵我。可能佢哋未見過更加大嘅場面、唔知 international嘅 standard，可能會覺得自己好犀利。」態度正確，每個人都有選擇，與其激死自己的細胞，根本就毋須理會啲麻煩嘢。