勇闖廣西狗肉節 中大少女護狗流落街頭 [FACE - 423] MF,

Suki在廣西求救時，在社交網絡留了手機號碼，回港後不斷被電話滋擾，因而怕了再出鏡，她希望大家關注在動物權益上而非她身上。

爆 Like王

勇闖廣西狗肉節　中大少女護狗流落街頭

廣西玉林舉辦狗肉節，香港中大少女 Suki和 Yannez勇敢北上，為反對食狗肉拍攝紀錄片，拍攝期間不斷受大漢滋擾，匿喺愛狗義工大本營又遇到兇漢上門搞事，被迫同義工帶住一批小狗流落街頭等救，幸好有其他義工團體伸出援手。

Suki回港後依然受電話滋擾，不過她們勇闖廣西的經過被報導後已引起極大迴響。週日（ 28日）約 500人由中環遮打花園遊行至中聯辦，促廣西省政府停辦狗肉節，兩女終於有回報。

Suki指有些狗販故意在她拍照時專登整痛佢哋：「佢哋係特登咁做，想博你同情心買咗隻狗。」美聯社圖片

一年一度的狗肉節今年在一片反對聲中照辦，但已規管不准當街劏狗，所以見少了血腥場面，但眼見一車車狗隻送到現場，仍然令 Suki好傷心。被訪者提供圖片

週日（ 28日）香港約 500名市民參與遊行，由遮打花園行至中聯辦，促廣西省政府取消狗肉節。《蘋果日報》圖片

F：《 FACE》　 S： Suki

F：喺廣西狗肉節遇到乜嘢滋擾？

S：有啲阿叔用言語挑釁我哋，但都算易應付，但我哋喺楊阿姨（其中一名義工）嘅義工基地嘅時候，有班男人走上嚟話笪地係佢哋嘅，擾嚷咗 3、 4個鐘，猛話啲狗好似好好味；後來 find out係有個老闆將笪地租俾個老闆娘養豬，老闆娘再租畀楊阿姨養狗，所以班男人就趕我哋走，我哋得幾個人帶住啲狗喺馬路等人救。好多人打啲狗主意，本來打算返香港都唔敢走，後來有南寧嚟嘅動物義工發現我哋，將啲貓狗送去第二度安置好，第日我哋至返到香港。

中外都有藝人如莫文蔚和《吸血鬼日記》男主角 Ian Somerhalder都在網上抗議舉辦狗肉節。網上圖片

F：此行對你有啲咩體會？

S：有啲新觀點，香港人鍾意貓狗係肯定嘅，但將呢樣嘢夾硬套落廣西人度係唔可行，講咩仁義道德真係勉強咗，即係如果有個國家係養曱甴當寵物嘅，叫你香港人唔好打曱甴你都接受唔到所以應該從食品安全呢個角度出發，我睇過中國食品安全法條例，所有未經檢疫嘅食物，隨便售賣係可以判監 7年，而玉林咁做係犯法，但政府坐視不理，係咪要有瘟疫死番幾千萬人你先會有行動呢？

Suki和 Yannez（右）在廣西拍紀錄片時不斷被大叔滋擾， Suki稱：「好彩佢哋只係言語上挑釁，未至於出手，我哋笑笑口應付到。」《蘋果日報》圖片

F：你反對食狗肉定係為咗動物權益？

S：主要係關注動物權益，動物權益層面好廣，例如化妝品、海豚表演、馬戲團同素食議題，狗肉節只係其中一樣；例如講動物實驗，點解我哋用嘅眼線入咗眼會唔痛？因為用咗過百隻兔仔做實驗，好恐怖！啲眼影要隊落眼醃 15日，睇隻兔仔有冇發炎，當中有好多係好痛苦咁死去，但其實上網就搵到好多冇用動物實驗嘅牌子，係有得選擇㗎！

F：有網絡文章抨擊你哋反對食狗肉係冇腦，你點回應？

S：我食咗 1年齋，生命係平等嘅！從來動物同人類喺呢個星球一齊生存，唔係應該和平共存嘅咩？點解人類恃住自己有啲小智慧，就不斷去諗啲變態嘅方法去剝削其他動物？我哋會關注所有動物權益嘅問題，希望影響到其他人，例如喺網上放啲動物被屠宰嘅片，就算唔完全戒肉都起碼食少啲。我已打算喺學校（中大）辦展覽，亦會搵外國傳媒幫手播紀錄片，盡我綿力

鍾意就快D Share啦！

下一篇 》