Andrew前後搣甩 26磅肥膏，飲食方面仲好節制，好似訪問當日，就算對住成枱點心，佢都只係食咗剝皮蝦餃，好自律㗎！
真面目
一開即韓 染髮操肌做韓星 激減 26磅 龐景峰：唔想打針食藥！
繼組合 GOT7成員王嘉爾（ Jackson）成為香港首位打入韓國市場做歌手後，最近又有新代表，主角仲係錢小豪同前妻郭秀雲嘅愛兒龐景峰（ Andrew）！做得韓星，樣靚身形梗係唔少得！所以 Andrew事前亦做足準備，又染金白頭髮，節食操肌減磅，最後成功搣甩 26磅肥膏，十足韓國 Oppa㗎！
Andrew接受本刊訪問時，談及減肥攻韓史，他說：「想健康啲減肥，唔想打針食藥，自己會做多啲運動！」拍攝韓 look當日，郭秀雲更陪伴在側好緊張，至於生父錢小豪係咪真係咁多年一毫子都冇畀過， Andrew就直言和爸爸很少見面，畢竟已和母親離婚多年；說到做韓星新聞忽然爆出是否爸爸多口，他就話：「信老竇唔會抽我水！」
25歲龐景峰（ Andrew）畢業後於 LA一間德國銀行任職經理，期間認識了有潮爆牧師之稱的美籍華人 Jaeson Ma，經他搭路， Andrew成功簽約 EWA經理人公司，去年 12月正式全職做歌手，仲同時間在 LA、韓國、香港、台灣同內地五地發展！
練足 6日
上週三（ 24日）一身韓 look影相的 Andrew，隨行的全是韓國公司的工作人員，問到當初入行經過，他說：「唔使好似見工咁㗎！佢哋只係測驗我識唔識拍嘢，上唔上到鏡，最後都覺得我有把聲喺度，只不過唔識點運用把聲啫！」
韓國娛樂公司出名要求嚴謹，樣貌同身形亦係重點訓練，肥底的 Andrew事前亦要節食操肌，他說：「訓練辛苦但絕對值得㗎！自己想健康啲減肥，唔想打針食藥，所以會做多啲運動！自己每日朝早 7點半起身食早餐， 8點游水游到 10點，之後做 gym做到 12點， 6點後就唔會再食嘢， 11點上床瞓，星期 6可以放假一日。最肥嗰陣 72kg，𠵱家就減到得番 60kg！」
據知 Andrew的韓文對答如流，原來前韓籍女友 Mirae有好大幫助，他說：「 3年前開始學韓文，自己似海外出世嘅韓國口音，𠵱家每日有 3個鐘學韓文，自己喺前韓籍女友身上都學到好多嘢。」
Andrew出道做韓星一事被搶先曝光，之後仲引發父母之間互數，對於父母恩怨， Andrew好維護：「只係一個誤會！佢哋不嬲少聯絡，有啲誤會啫！（老竇錢小豪抽水？）佢係唔會抽我水！佢唔會特登傷害我，因為佢係一個好努力嘅老竇！雖然離咗婚，不過一樣擺咗好多心機去照顧我！自己做埋手頭上嘅工作，就會抽一、兩日時間探佢同爺爺嫲嫲。」
同錢小豪互數 郭秀雲：唔打算開戰！
郭秀雲同前夫錢小豪恩怨再次被擺上枱，郭秀雲就話冇意互數，「我唔打算公開開戰嘅！其實大家都冇乜嘢！加上自己都唔知原來抽水係有咁多種意思，所以自己都唔算怪佢，因為佢都應該唔知咩事，佢當時應該都係開心 share，唔會諗得咁深入！」
𡃁模前度冇聯絡
Andrew同模媽 Mia拍過拖，當時兩人不時網上晒恩愛，其後有傳因為媽咪郭秀雲棒打鴛鴦導致分手，對此傳聞， Andrew說：「以前已經答過，冇必要再答，總之就唔係真囉！
|
鍾意就快D Share啦！
|
|
|
