Regen遇電話騙案 報警求助
電話騙案時有發生，今次輪到歌手張惠雅（Regen）不慎中招！大清早接到騙徒假冒速遞公司來電，仍在睡夢中的她「矇查查」地將身份證等個人資料告知對方，清醒後才知「賴嘢」，即急急到警署報案。
遇電話騙案的Regen，昨午到東涌警署報警求助。
Regen在Facebook詳述因未瞓醒而自洩個人資料的經過。
騙徒的手法層出不窮，而且緊貼時事，近日有不法之徒瞄準港人熱衷網上購物，於是假扮速遞物流公司，以「釣魚」方式致電受害人騙取個人資料。最新的苦主竟是前組合HotCha成員Regen，昨晨她在Facebook發表長文講述被騙經過，表示接到操普通話、自稱是速遞公司員工的來電，指她有郵件，然後問她全名和身份證號碼。
訛稱包裹內地扣查
大清早被來電吵醒的Regen，由於未瞓醒，所以矇查查地乖乖向對方奉上珍貴的個人資料：「有個電話話我有郵件，要查詢就按０，然後一個男人接聽，問我名同身份證，我好愚蠢咁講晒出嚟。」然後對方又指她上月寄出一個包裹，在深圳被扣留，內裏發現有十多本護照嚇到呆咗，對方更堅持要幫她將電話轉駁到上海公安報案。愈聽愈覺不對路的Regen掛斷電話，但有感已將全名、身份證及電話號碼給予對方，於是留言寫道：「好恐怖，我係咪會賴嘢！」不少人留言指她遇上騙徒，建議她盡快報警。
而昨午Regen親身到東涌警署報警求助，事後她受訪時說：「因為我冇為意，接通電話係個講普通話嘅男人，成件事我覺得好真，因為我以前試過網購，都係嗰間速遞公司送貨，所以佢問我全名同身份證號碼核對資料，我好低能咁講晒，連屋企電話都講埋。」後來當對方稱其包裹被扣查，又稱查到當中有十多本護照時，她才心知不妙，向對方聲稱要報警：「佢好似有小小淆底，奇奇怪怪，話要我打去上海公安報案，加上我又聽唔清佢啲普通話，唔知佢係咪心虛，少少唔耐煩，我就話唔講，收佢線。」
幸保銀行戶口號碼
「清醒」後的Regen細心回想，一般網購即使要核對身份，只需證件上最後三個數字，她笑說：「知自己賴咗嘢！希望大家都留意吓呢啲新聞，呢排我做嘢冇乜留意警訊，唔知道有呢啲騙案。」又解釋當時因「神志不清」才中招：「因為畀電話嘈醒，朦朦朧朧先答佢問題，第一次遇上呢啲騙案，都唔係蠢呀！我都冇畀（銀行）戶口冧巴佢，不過都係報警安全啲。」
遇電話騙案的Regen，昨午到東涌警署報警求助。
Regen在Facebook詳述因未瞓醒而自洩個人資料的經過。
|
鍾意就快D Share啦！
|
|
|