2015年8月6日 星期四

用完即棄 亞視新主 架空烈士葉家寶 [壹週刊 - 1326] 葉家寶,亞視,M1,



有指新上任的董事馬熙,及董事總經理 Jan Ho,只一味向亞視員工施壓,被人在背後稱他倆為「何馬」組合。

探熱針

用完即棄 亞視新主 架空烈士葉家寶

經歷亞視改朝換代七次的葉家寶,為執王征手尾,去年硬食執行董事一職,撲水出糧到搵白武士救亡,乜都關佢事,成為亞視史上最有人氣高層。

為亞視做牛做馬,最後被新老闆架空,遭削權的葉家寶還要為公司揹上百張欠薪告票打官司。真係十個慘!

出面做傀儡

為亞視仆心仆命的葉家寶,最後換來是被新老闆架空。一朝天子一朝臣,上月已向亞視落訂的山東集團話事人司榮彬,未正式成交,已急不及待「入屋拆牆」。

據悉,早前新主開會下令大改革,成立亞洲傳媒集團,將亞視收歸旗下,並「欽點」過去負責賣片部主管馬熙做亞洲傳媒集團董事。雖然未向外公布,但內部已經知道流住亞視熱血的葉家寶,再無實權;就算早前他現身新一屆亞姐宣傳,只是繼續做傀儡,幫公司做「擋煞紙板」。

至於新上任的馬熙,有指是新老闆心腹。

「馬熙升做董事,公司啲員工都𢱑爆頭,佢過往負責賣片外,好似○八年奧運節目咁,就俾高層拍枱鬧佢冇嘢做過。揀佢因為係新老闆心腹,有個叫 Jan Ho嘅女人,依家係亞洲傳媒集團董事總經理,佢係亞姐巡迴賽美國站搞手,亦有買亞視節目去其他地方,所以同馬熙好 friend,用自己友囉!

去年亞視冇糧出,撐住爛局的葉家寶率台前幕後搞騷籌旗。

連鎮台節目《六合彩》都冇埋,日前六合彩之子蔡國威喺節目同觀眾道別。

誇下海口

董事個位有人坐咗,執行董事根本可有可無,葉家寶知道自己被架空都好冇癮,但佢就係咁,以前就算由高級副總裁降到做市場營業部都唔出聲;最慘係頂咗執行董事個位,先知公司欠薪官司係要佢孭,每張告票罰一萬,自己俾錢打官司,新老細仲咁對佢,好慘!」知情者爆。

當年王征曾大口氣要將亞視打造成亞洲 CNN,新上任的「何馬」組合更誇張,準備搞全球招募員工外,還號令要將得一點收視的亞視衝出亞洲,進軍國際,兼且要開唱片部和拍電影捧人,野心大到笑死員工。

已被架空的葉家寶,上月底還要跟幾位前亞姐宣傳新一屆亞姐選舉,做出面傀儡。

玩殘亞視後,有指近日王征忙於在俄羅斯搞地產。

硬食執行董事一職後,葉家寶要將公司過百單欠薪官司孭上身,真係一殼眼淚。

亞姐唔齊腳

王征拖糧日子,繼續同亞洲會要員歡宴,而葉家寶日頭厚住面皮為亞視拆彈,夜晚就要陪王征玩,辛苦晒!

「 Pair『何馬』開會話亞視牌頭勁,可以幫內地製作單位省招牌,所以一定有好多人主動敲門同公司合作。佢哋仲話要搞埋亞姐全球競選,目標係賺兩至三億,但大家都知道,過往亞姐巡迴騷頂多賺幾千萬。前排葉家寶走出嚟話今年亞姐會增加到一百位入圍佳麗,但到依家內地主辦單位反應冷淡,有排都未搵齊腳,本來八月開波,依家唔知佢哋點收科。」知情者說。

亞視員工以為白武士出現,公司將有轉機,但領教過「何馬」做事作風後,據知有部分核心員工,已陸續請辭,唔再堅持留守亞視。

對於亞視內部已欽點馬熙上任做董事,他變相被架空,求證葉家寶,他聞言顯得避忌:「呢啲傳聞我唔會評論,總之沒有這樣事情發生。」便匆匆收線。

爛頭卒

葉家寶在亞視最困難時期,被委任入董事局孭飛,在公司危機中身先士卒,飛身擋子彈;為保住員工,四出撲水出糧,又不時厚住面皮為公司拆彈。不過,化危為機後,回報是白做一場。

搵白武士

亞視營運資金持續短缺,葉家寶四出搵白武士打救公司,有指他先後跟銀河娛樂主席呂志和、資深電視人徐小明負責的財團等傾合作,最後落實新老闆是山東集團董事長司榮彬。

撲水出糧

亞視每月營運開支逾二千萬元,由於股東不再注資,葉家寶不惜出售亞視大量劇集的版權,甚至連《亞洲先生》、《亞洲小姐》等品牌也計劃放售。員工搵錢出糧,世界奇聞!

面懵招募

不獲政府續發免費電視牌照的亞視,廣播至明年 4月 1日告終。但上月亞視竟然公開全球招募,葉家寶又被派做爛頭卒,在網誌透露公司未來將以亞洲電視、亞視衞星電視和亞視 OTT平台的「三亞」發展,遭網民質疑:「請人有冇糧出?」、「係唔係請義工?」

撰文、攝影:娛樂組

nextb@nextmedia.com

鍾意就快D Share啦!