65歲嘅松哥劉松仁，92年迎娶比自己細廿年嘅空姐蘇嘉燕之後，仍然不時被拍得同其他女伴撐枱腳逛名店，上月又被拍到同大班靚太到大埔郊遊。報道仲話佢同其中一位紮起馬尾、貌似馬賽嘅闊太特別好傾，郊遊之後松哥仲同呢位疑似闊太撇低同行朋友，去咗九龍塘會會所繼續約會。事後松哥直斥報道無中生有：「講多無謂，一切都會過去的。時間可以證明一切。」
松哥同蘇嘉燕係喺飛機上結識，拍拖數月即閃電結婚，婚後劉太相當低調，松哥亦非常體貼0架，日夜管接管送，仲要落街買鑊兼陪睇中醫，來回機場送老婆返工，盡現溫柔；而雖然松哥不乏花邊新聞，但劉太對其非常有信心，繼續俾佢自由度同異性約會。
今日呢，松哥就唔陪朋友，專心一意陪太太，一齊去圓方睇《職業特工隊：叛逆帝國》。下晝5點40分左右，松哥同太太抵達圓方，一路行一路傾，腰間繫住腰bag嘅松哥笑容滿面。兩人一早訂咗飛，睇到7點半左右一齊走。因為散場時好多人，松哥亦特別戴超，同太太保持前後腳，繼續low profile。
睇完戲，有啲餓，落下一層拎飛食意大利嘢，但成十幾人等，太太就話不如去第二間食啦咁，於是兩人去咗隔籬間cafe食pizza飲咖啡，太太仲好貼心咁，幫老公碟薯條唧茄汁，而松哥就專心鋸扒。
食完之後，松哥就變低頭族，密密篤手機；太太食飽之後，都篤咗陣，無聲勝有聲。到臨走前嘆杯啡，兩人終於傾下偈談心，由松哥埋單簽卡走人，再去客戶服務櫃枱蓋飛free parking，然後就車太太走喇。
|
鍾意就快D Share啦！
|
|
|