蜜瓜，蜜瓜。蜜瓜的意思，原來就是勿瓜。
唔好死呀HKTV！雖然好多人行情看淡，認為港視已呈垂死狀態。但王維基呢招網購jetso「買夠400蚊有禮物送」想出送蜜瓜，都係想同大家講聲「勿瓜」，但李姓網民不懂其心意，落單時只係一心諗住送咖啡機，轉過頭俾錢就變咗送蜜瓜，嬲嬲豬放上網，結果由維基化身最強CS，親自「解蜜」，免費賣廣告，贏得無數like，效力分分鐘勁過豪花逾3,000萬元承包港鐵所有站落廣告賣廣告。
依家，王維基又有新招，就係——送蜜瓜。唔係解蜜咁簡單，而係真係送蜜瓜。話說，維基諗咗條橋，叫做WhatsApp送大禮，今明兩日，下午兩點至晚上九點，太古城同康怡嘅客戶，唔需要買任何嘢，只要你WhatsApp自己心水禮品編號到指定號碼，就有機會得到禮品，包括梅酒、玄米茶、午餐肉等等。其中一款禮物係蜜瓜，係真係王維基自送貨0架，一小時內送到添!
受颱風蘇迪羅影響，天氣持續酷熱及有煙霞，天文台錄得最高氣溫36.3℃，為天文台1885年有紀錄以來最熱的一天，王維基揀今日送貨。下午三點左右，維基現身太古坊同康怡一帶開始送貨，大部份客都係揀送蜜瓜。咁啱今日送貨嗰陣，維基仲撞番舊同學，集郵是常識吧。
維基上樓送貨，當然係有同事幫佢pack好晒啲貨先，然後維基就樓下撳對講機：「維基送貨！」派到咁上下又走番上車「補給」繼續送，期間頻頻抹汗，真係好鬼熱0架！
問維基點解要親自送貨？佢笑笑口話:「想試下自己同事運送過程辛唔辛苦，自己體驗下。今日全部禮物都係免費送贈。」本來仲有巨峰提子送0架，但因為天氣唔好，所以聽日先送。維基話:「今日都派咗五、六百單0架喇，(用咗幾錢？)維番成100蚊一個蜜瓜，你諗都諗到條數約略幾多都五位數字0架喇。」
咁送貨嗰陣多唔多人集郵？佢話都多0架，認得佢嘅通常都會順帶集郵，飲水當然要啦，不過真係好趕。咁會唔會收貼士？「唔會啦，員工都唔收得0架！」
| 採訪、攝影：吳耀輝、羅德光 |  就係呢個行動喇！ |  點點數先 |
 |  |  維基送蜜瓜 |
 |  |  |
 |  |  Running man！ |
|
鍾意就快D Share啦！
|
|
|