掃呢頁CODE去手機

2015年8月29日 星期六

豹嫂陪行街 豹哥揀電話殼諗成個月 豹哥,胡蓓蔚,豹嫂,單立文,





其他影片:>>






喪抄外國talk show嘅《今晚睇李》,仲有唔夠一個月終於玩完,喺節目負責夾band嘅「豹哥」單立文,唔知係咪一身鬆晒,所以得閒同老婆去行街呢?

早排夜晚,豹哥同「豹嫂」胡蓓蔚去銅鑼灣行街,男嘅「花哩碌」,女嘅小背心加草帽,好有夏天feel!兩位一入賣精品嘅鋪頭,就去咗睇iPhone電話殼,豹哥睇嚟睇去,都係揀啲cute爆bling bling款,估唔到佢好呢味嘢喎!

不過揀咗一大輪,豹哥都係揸唔定主意,最後仲乜都唔買就走咗去。難為體貼嘅豹嫂,叫個店員埋嚟問長問短,唔知以為個殼係咩高科技電子嘢。問完喇,豹嫂就做跟得夫人,陪豹哥睇其他精品,而豹哥就繼續咩都拎上手望兩望,行咗半個鐘就鬆人,運吉冇幫襯。

其實早喺上個月,《今晚睇李》仲錄緊時,豹哥已經一支公行銅記,當時佢又係去精品鋪,又係想買電話殼,又係揀唔啱,依家舊地重遊,加上有豹嫂幫吓眼,點知都係空手而回。

其實都係買個殼啫,又唔係買樓,唔使諗成個月吓嘛?
鍾意就快D Share啦!