1. 美國運通百夫長(Centurion)卡
百夫長卡，亦即係傳說中嘅黑卡。話說早於80年代初，江湖就已經傳聞AE出咗一張極罕有、極高級同時又極神秘嘅「黑卡」，但事實上要等到成件事傳咗十幾年，AE先真正推出呢張「百夫長卡」。物料方面，百夫長卡用上電鍍鈦金屬，所以先有獨特嘅黑色。
要擁有AE黑卡，必須要通過AE嘅主動邀請。而最神秘嘅係AE咁多年黎都冇講過佢嘅邀請準則係咩。有指其中一個條件係每年簽帳額要達到25萬美金(約193萬港元)。當然，年費方面亦都相當「可觀」。香港區AE黑卡年費係好好意頭嘅$38800港元，首次申請要再畀一樣咁好意頭嘅$38800手續費，即係未見官就先畀8萬銀。
但係值得嘅！因為你除咗可以享受N種專貴服務，最重要嘅係碌卡冇上限。例如中國天茂集團總裁劉益謙，就試過喺2014年一個蘇富比拍賣會上面，一炮過碌咗隻盛惠2.8億嘅明代「斗彩雞缸杯」返黎。如果用所得嘅積分去換百佳現金券，都可以換到接近140萬返黎！咁嗰八萬銀又點算係錢呢？
2. 摩根大通鈀（Palladium)卡
相比起AE黑卡，摩根大通呢張「鈀」卡就經濟實惠得多。一年年費只需595美金(約4600港元)，仲平過你供強積金。但換返黎張卡就已經係用鈀、23K金同其他貴金屬所造，成本價都要接近1000美元！計落係申請完唔用都有賺。
但呢張卡可能比起AE黑卡更難到手。因為首先你要係摩根大通嘅私人銀行客戶，仲要有起碼2500萬美金(約1.93億)資產喺摩根旗下先有機會申請。難怪Bloomberg會用「1%人中的1%人才有機會擁有的卡」黎形容。
擁有呢張卡之後你基本上會於一切手續費、亦可以使用全球超過600個機場嘅貴賓候機室。甚至如果你唔想等，亦可以選用號稱全球最大私人飛機服務嘅「MaequisJet」添！
3. 杜拜第一皇家卡
唔鍾意貴金屬卡？咁呢張皇家卡(Royale Card)就啱味啱哂你。表面上佢就只係一張有條金邊嘅普通黑色卡；實際上，佢上面痴咗粒.234卡嘅鑽石上去。難怪發卡公司杜拜第一嘅總裁Ibrahim al Ansari會話呢張卡係「世界上最獨特嘅卡」。同AE黑卡一樣，成為卡主嘅唯一辦法就係得到杜拜第一嘅邀請。而除咗有錢之外，最容易得到佢哋青睞嘅方法就係有個皇室身份－－話哂都叫做「皇家卡」嘛！
咁皇室成員有咩福利？al Ansari話就算你想要個月亮，佢哋都會嘗試摘比你！更加唔好講咩奧斯卡門票、飛去德國試新波子等等等等。
而另一個賣點就係用呢張卡嘅任何消費都可以享有4%現金回贈，而且除咗7000迪拉姆(阿聯酋貨幣，即約14800港紙)首次申請費之外，往後都唔需要畀任何年費。點解聽落去呢張卡咁節儉嘅呢？
4. Coutts 絲卡
「Coutts」乃係世界上最早成立嘅銀行之一，成立於1692年，目前由蘇格蘭皇家銀行擁有，當今英女皇伊麗莎白二世都係佢哋嘅客戶之一。
當然，「絲卡」唔會係用絲造，只係用上中國絲綢嘅紋理為設計意念。卡主可以使用其禮賓服務，打點上至宴會請客飛機酒席事宜，下至幫個仔搵最好嘅補習老師等等等等。
絲卡亦係今次介紹嘅五張卡之中唯一一張有簽帳上限嘅信用卡。最基本上限為30000鎊(約36萬港紙)，當然亦可以與銀行構通以增加上限。
5. 花旗銀行Ultima Infinite
如果話上面呢幾張係遙不可及，以下呢張就應該係距離我哋「最近」嘅富豪級信用卡－－因為佢只係提供於新加坡、印度、香港以及阿聯酋4個地方，係咪好近呢！
要成為Ultima Infinite嘅卡主，你需要擁有500萬新加坡幣(約2800萬港紙)資產，而香港區年費就係同AE黑卡同樣咁好意頭嘅$23800。每個卡主都會擁有一名私人「生活經理」，佢除咗會幫你安排一般禮賓服務，更加為親身送你張卡到府上，並且了解一下你嘅生活興趣，再向你提議不同嘅活動、玩意。而且每年都會有特別獎賞，例如香港區嘅卞主每年都會自動獲得12萬飛行里數，足夠換一張倫敦商務客位來回機票。
|
鍾意就快D Share啦！
|
|
|