最懷念娛樂雜誌 《 Yes!》雄霸 80後 [FACE - 428] MF,

全知言

最懷念娛樂雜誌　《 Yes!》雄霸 80後

隨住手機 app興起，大家又慣咗唔使錢睇新聞，令紙媒步入寒冬，亦令唔少報紙、雜誌消失，但消失不等於被遺忘，唔少明星都仲記得細個有追雜誌，尤其上年消失嘅《 Yes!》，入面專影靚女嘅「城市驚喜」，星座甚至《 Yes!》閃卡，好多人都試過要落報攤等出版第一時間買。所謂那些動人時光已不復再，所以有得買好買喇！

陳瀅　狂追愛情故

以前喺外國讀書，每次返嚟香港都買好多《 Yes!》，因為好鍾意睇裏面嗰啲內容啦，同埋入面嘅愛情小說，仲有小問卷，答邊幾個就知性格係點，適合邊一類男仔，我就好鍾意玩，入面仲有好多閃卡，以前就好鍾意黎明同周慧敏嘅閃卡。

《 Yes!》當年除咗雜誌暢銷，閃卡更係每個後生仔必備，閃中閃、暗閃呢啲 term有儲開實識！

雨僑　八卦新聞睇到喊

我好記得以前有期《 Yes!》封面係孫耀威，標題寫到佢同酒井法子一齊咁嘅，由於當時孫耀威係我偶像，為咗呢個封面喊咗好耐，內頁係拖手，但封面我就不肯定，但我已經好耿耿於懷啦，我直頭撕咗嗰幾版，唔想睇到佢哋拖手，諗番真係好幼稚同無聊。

孫耀威當年同酒井法子合唱〈有緣千里〉，當年 K歌必唱，𠵱家連卡拉 OK都少人去

周柏豪　必睇「城市驚喜」

我最懷念嘅娛樂雜誌就係《 Yes!》，裏面有「城市驚喜」啦，睇到一啲比較靚啲嘅人做一個訪問啦，同埋入面嘅星座呀，咁就會睇番自己嘅星座，又會睇番自己喜歡嘅女仔星座，佢嘅星座會唔會話同我夾呢？如果有，就會覺得好有緣！希望佢第時會復活啦。

當年《 Yes!》有個欄目「城市驚喜」有唔少校花校草睇，當年有份上榜係一種榮幸。

邵仲衡　提前懷念《忽周》

我會揀《忽然 1周》啦，我好喜歡呢本雜誌，加上我太太每期都買，除咗內容之外，美術、排版設計我都好喜歡！極之可惜啦，佢每期嘅專訪，我覺得做得好好，寫嘅角度係好有自己 style。

《忽周》創刊 20年，有唔少封面都令人記得，其中創刊號謝賢拍霆鋒着三角褲，𠵱家叫佢哋影都唔得

街坊最愛《忽周》

《 Yes!》係唔少明星嘅集體回憶，但估唔到有唔少後生仔最記得係《忽然 1周》！大部份都係因為阿媽買，之後攞嚟睇，所以話師奶市場先至係王道，唔怪得大台狂拍師奶劇啦，不過《忽周》本週最後一期，快手搶喇！

李生　 18歲

《忽然 1周》囉，以前係因為飲茶，有屋企人買就攞嚟睇，鍾意睇明星緋聞啦。

林生　 19歲

細個喺屋企間唔中有本，就攞嚟睇囉，都係鍾意睇娛樂新聞，邊個同邊個拍拖嗰啲，反而《飲食男女》我唔會睇。

Joy

我最懷念當然係《 Yes!》啦，因為入面有「城市驚喜」，入面好多靚女睇，仲記得係買一本，然後全班傳嚟睇。

鍾意就快D Share啦！

下一篇 》