網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年8月5日 星期三

呃 like神人 自救秘笈 雨僑:我係小強嚟㗎! [FACE - 428 - 專訪] 雨僑,羽翹,MF,



真人騷

呃 like神人 自救秘笈 雨僑:我係小強嚟㗎!

這是一個呃 like的時代,而雨僑,就是呃 like界的佼佼者。

初出道時翻唱、教化妝實情騷事業線嗰種,佢自己都認 level低、屬於入門級,呃足七年 like,今年兩大代表作至係呃得有層次:

拍 MV,配相係外賣豬扒湯通粉,加五蚊等於加兩包茄汁,咁就 8千個 like過千 share,話茶餐廳 creative,其實雨僑曲到直宣傳新歌〈行為藝術〉,仲有諗頭!

唱 Live,親自搵嚟神級網絡紅人「娃娃舜」重出江湖,由預告到戲肉求其一條 link都閒閒哋 50萬點擊,一夜之間,你計下多咗幾多人知雨僑拍咗套新戲叫《猛龍特囧》?

今年 29歲,會考 26分,大學其實喺港大主修生物; 08年出道,在 YouTube冒出頭來,本來是因為歌藝、琴技同美容教學;話說讀咗三年生物,雨僑話唯一學以致用係可以攞嚟睇化妝美容產品成份;數同年新人,除了大台徐子珊、皇帝李治廷,幾乎已經全部消失,而雨僑的生存之道,連香港大學都冇得教,所以話唔好睇小啲 like,更唔好睇小雨僑:「我係小強嚟㗎,啲人成日話我紅又紅唔起,但我死又死唔去喎!學似啲亞視員工話齋,啲嘢要拉勻一世嚟睇,咁我簽咗份十年嘅約,唔通唔紅就唔做喇咩?一日未走得,咪搵啲鍾意嘅嘢嚟做下囉!」

事業線 呃 Like咪低手囉!

新歌〈行為藝術〉講綠茶婊(作狀女人),嚴格嚟講你都係網絡紅人,你最憎咩網上行為?

第三位,影完合照淨係執靚自己,等人哋樣衰晒,真係有一類人,專做呢啲嘢。

你呢?執相執得好公平?

係㗎,一係用自拍神器,個個都會靚晒,我唔會淨係執自己囉!我哋呢啲拍開片,冇嘢重要得過爭取光源,不過呢個動作變咗職業病,有一次同青雲哥哥合照,結果影到青雲一 pat嘢咁,又唔好意思叫人再影過……第二位,圖文不符!「我病了」或者「今日陽光真燦爛」嗰啲,其實係唧個胸出嚟。其實你諗下,又要喊又要自拍,仲要打埋個 status出嚟,呃 like感太強。

 你自己有冇做過先?

有!我唔介意講我都有做過,我都知好多人討厭我,所以最近都少咗。雖然無論藝人同平民都想呃 like、都想被認同,但係呢種循環用真係好煩。不過講真,事實上又係,你飛去北極影個北極光,都唔夠喺屋企張床「病咗呀」咁多 like,總之事業線係最低手嘅呃 like,適可而止啦。

 咁第一位呢?

講出嚟會唔會俾人打呢?我真係老喇,我真係好唔鍾意嗰啲「禾甘日巧膠興牙」、「巧打耳」、「巧威威」嗰啲,你講咪算囉,係都要打啲同音字出嚟,死人喇真係!

你真係老喇,八月就滿三十歲?

係我認,我真係老。二十歲時冇諗過三十歲會點,覺得好遙遠……不過宗旨冇變嘅,都係要開心、要做啲對得住良心嘅嘢。

09年出道同期歌手有邊個?

洪杰、韋雄、麥家瑜、溫家恒、謝依穎、余翠芝、溫家偉、王梓軒、樂曈、周子揚、李治廷,仲有徐子珊。

真係除咗做電視嗰班,大半都消失咗,事實證明你係成功。

我係小強嚟㗎!咁份約係簽咗五加五,一共十年嘛,唔通唔紅就唔做咩?搵啲鍾意嘅嘢做下囉。我讀咗廿年書出嚟社會做嘢,除咗頭兩年,三個新人爭十幾個獎都冇獎外,打後呢幾年我都仲係覺得好好玩。

老闆你做乜睇股票 唔去爭獎?

你真係試過三個新人爭十幾個獎都冇?

你諗吓,四個頒獎禮加埋幾十個獎,叫得出名嘅得嗰幾個,比例上仲唔係三個新人爭十幾個獎?

第一年你真係冇獎?新城都冇?

真係冇,新城都係俾個優異獎( 09年度勁爆新登場創作歌手)我咋!因為我老闆嘅宗旨係做好自己,唔需要理出面上唔上榜!

蕭定一唔似其他唱片公司高層,唔會同啲電台電視台高層聯誼?

佢做電影,想傾都唔知搵邊個傾好……

你覺得啲獎對你真係咁重要?

你老人家肯打個電話去,咁我又行得舒服好多,點解唔幫下我呢?我入行真係乜都唔識、一個人都唔識,淨係識我老闆一個咋嘛。年尾之前兩個月,我已經走去問老闆:「啲獎係唔係要俾錢買㗎?𠵱家係唔要傾定做定嘢㗎喇?」佢話:「冇㗎!唔使㗎!」

 咁跟住呢?

跟住就真係乜獎都冇囉……哈哈……我試過參加雜誌新人投票,連老蕭(蕭若元)都叫埋佢啲 fans幫手投,投到第一名,但個雜誌頒獎禮係唔使我去囉……其實人哋 rundown定晒,冠唔冠軍又點?返到嚟真係同蕭定一發火,仲反埋佢個電腦:「你仲睇緊股票?!」𠵱家我咪明囉……

點解明呢?

佢嗰套係,有獎並唔代表你做得好,我𠵱家明,因為睇到自己公司越嚟越壯大。以前我都唔明,點解人哋做新人坐七人車、成團人跟出跟入,我係一個人呢?結果咪……我同期新人羨慕嗰幾個,佢哋間公司咪執咗囉。

一開始有啲咩你要自己做?

自己化妝自己整頭,自己搭車自己買衫,自己作曲自己填詞, CD cover個盒係我自己去工廠區搵,第一、二隻碟都係咁做。𠵱家諗番,其實都幾好玩。

你係港大高材生,點解會做咗呢行?

爸爸做消防員,媽咪係小學教師,我喺長洲大,三年班考咗港島嘅學校(小學聖嘉勒,中學英華)……啲人話跨境學童辛苦,我又覺得冇乜嘢,我細個都係咁大:朝早四點幾起身買早餐上船,程程上船都見到日出,晚晚返屋企一定天黑。我讀書時勤力㗎,知道自己前途要自己出力,但係會考廿六分,其實都強差人意,因為考數學嗰日我係緊張到嘔落份卷到……結果用咗成廿分鐘嚟清理,都做唔晒份卷,諗住一定攞 A,結果得 B。我嘅理想成日變,讀 HKU生物時,自己開始分心、開始想唱歌……媽咪梗係好唔 ok,佢未必講出聲,但係好大心理壓力,我做咗咁多年,佢都係一有好工就會介紹我知,有一次讀大學我話想做主播,屋企人係開心到請食飯……因為我終於知自己想做乜。

最美好係同羅力威 一齊成長。

媽媽做老師,用咗咁多時間精力栽培你,會唔會好失望?

非常失望,非常唔支持。我喺屋企拍片,佢會黑晒面,睇開我啲片都知,有時我係走咗入廚房拍,或者踎喺角落頭地下囉……因為呢樣嘢冇人做過、一開始完全冇錢收,同我媽咪 buy嗰套完全兩樣。佢教書,日日對住學生同家長,我嘅一舉一動都會令佢俾人講閒話,呢啲唔應該由佢承受。雖然我都叫循規蹈矩,但娛樂新聞嘅嘢你都知……雪中送炭好容易,但錦上添花嘅人好少,我做得再好,批評嘅總多過讚多句嘅人,我冇所謂,但係我唔想佢聽到。所以我成日教育媽咪,呢個世界冇一條既定嘅成功路,學似亞視員工話齋,啲嘢拉勻一世咁睇,呢一刻唔代表永遠。

有咩想同媽咪講?

其實咁多年佢已經同我一齊成長,佢嘅世界太美好,喺一個美麗小島、純樸嘅小學過咗大半生,佢唔適應我嘅世界可以好邪惡,同 fans講小一句生日快樂就會俾人用粗口鬧成版……佢叫我個個都唔好得罪,但係公平咩?係我錯咩?

你同羅力威係唔係公開咗?

𠵱家報導連「緋聞」兩個字都慳番?

冇吖,你哋有你哋寫咋嘛!

佢話自己生得似木村,你認唔認同?

我覺得佢似黃子華多啲。

你會唔會教佢,點講嘢至叻?

我唔會,我覺得兩個人唔應該太似,如果唔係你永遠冇辦法吸收唔同睇法同意見。

你認識嘅羅力威同你最相似同最唔似嘅地方係?

神人助陣

《猛龍特囧》

公開秘密

圖片

港大女生

《喜愛夜蒲 3》

網上圖片

《出水芙蓉》

自彈自唱

YouTube畫面

點擊女王

YouTube畫面

佢叻過我好多,有才華過我好多,佢唔係閒聊嗰啲人,淨係會講重點。

佢平時咁靜,做男朋友 sweet嗎?

我好怕啲人太肉麻,好怕啲人特登公開做啲肉麻嘢,雖然佢都有寫歌俾我,係唯一一個男歌手寫歌俾我,但係我驚啲人晒上網:我哋十週年喇!

就快三十歲,你覺得你哋兩個之間最美好嘅事係?

最美好係一齊成長、一齊經歷,而我只想同呢個人一齊經歷。即係發生任何事,我都係第一個同佢講……所以我一直拍拖,男朋友年齡都同我好接近,我鍾意同佢處於同一個人生階段,一齊變呢件事特別微妙。我記得有一次有人叫我寫信俾十年前嘅自己,我真係想同二十歲嘅我講:唔使擔心,三十歲時所有嘢都剛剛好!

要 like

一路喊一路自拍,連雨僑咁鍾意呃 like都話太刻意做唔出,咁一路喊一路俾人拍得喇啩?

係嘅,講到媽媽一直不太認同自己工作,雨僑哭了:「換着係我個女,成副心機時間栽陪佢讀到港大,佢走去唱歌教化妝,我都會咁諗。」

伯母,係真㗎,做人要拉勻一世嚟睇。港大有教嘅,雨僑學得到,港大冇教嘅,一樣做得好過人,呢個女,係唔係要 like?

鍾意就快D Share啦!