中環人語
呂耀東有索女伴行澳門
上週六澳門銀河娛樂個新商場開幕，小宗梗係去八吓，仲碰到老闆呂耀東，同一個二十多歲嘅索女行過。呢位索女紮住一條大辮，操一口普通話。佢哋一路行、行、行，行咗去 UA戲院，全程有講有笑。緊接兩個保鑣就出現，從後跟到實。
呢位索女，同呂耀東嘅愛女有啲相似。呂耀東向來好少介紹佢仔女，佢有兩子一女，並曾經講過，女兒已經大學畢業，並盛讚個女有愛心，想做教師。但呂耀東要求女兒一定要到銀行浸吓，結果女兒在投資銀行試了一年，攞了牌，但仍然沒興趣，呂耀東亦沒有勉強。好多富豪嘅第二、第三代，都會入 iBank轉個圈，好似郭炳江個仔郭基煇、鄭家純個仔鄭志剛等。啲投資銀行亦好樂意安排個位俾呢啲富二、三代，無他嘅！以佢哋人脈，多少幫銀行𢱑到生意。
金融逍遙客：磨練政壇童子軍
游走於中港台併購、私募投資的金融多棲動物，現為多間上市公司主要股東及董事
看着民主童星黃之鋒在電視上，回答記者被控衝入公民廣場時，稱只是進入那個 2013年仍可合法進入的地方。在 2015年的今天，用 2013年的規例作辯護？顯得強詞奪理。另一邊廂，學聯領袖口窒窒講如何在法庭抗辯，亦令人啼笑皆非。逍遙客覺得，廣大股市阿婆大伯，都比呢班童子軍可愛可敬得多，連月股市陣陣血雨腥風，有股票在手嘅股民刀刀見骨，斬倉客也冇投訴過要俾番$75蚊滙豐，或$135蚊騰訊，俾佢平倉。贏就鮑魚撈飯，輸就捱住美心四寶飯（編按：美心快餐現只賣五寶飯），呢啲先係做人基本常識。
任何想出頭做領袖嘅人，浸多啲墨水只係基本功。要帶領民主自由運動，即使唔睇吓伏爾泰、孟德斯鳩大作打底，也可參考大師兄李天命的《思考藝術》，再唔係長期跟蹤吓陶傑文章補充吓思想養分。甚至口水才子周顯的見解，都可以令自己開開眼界，增進吓邏輯思維。政壇童子軍應加強學習吓 fundamental，正如炒股票多少要識啲市盈率市賬率或 RSI之類，否則難免繼續開口夾着脷，歪理當道理。誰人無錯，但輸就認，打就企定。勇於擔當，呢啲先係令我哋引以為傲嘅另一種香港獅子山精神！
上個禮拜寫福臨門，有老友話我咁樣會得罪人喎，喂，我講嘅嘢係事實，唔篤正佢，唔鞭策吓，香港飲食業仲點會有進步呀？
由是，今期我專程殺去薄扶林，訓練飲食界從業員嘅中華廚藝學院踢場；之前聽酒店啲口痕友講，話呢間學院好似唔想人申請入會咁；實情唔係喎，做會員千鬆啲銀一年，佢有專人打電話用英文同你解釋，話希望會員多以英語跟學員溝通，又話 menu菜式選擇有限，侍應都是實習學員，想吸收前線經驗，水準未必到家，你 OK先入會㗎，夠晒均真。
百四蚊一個中式 lunch，仲冇加一，抵到爛呀，淨係個海景就夠殺食，直頭好似踩住個貝沙灣嚟喫飯；整多碗羊肉拉麵都係$50皮，呢度俾學生學嘢，唔似得出面啲食肆，吓吓計住，材料真係「不計成本」，嗰杯八寶茶料好足，打包返屋企沖多幾次都得；不過，我奇怪啲侍應個個都咁有「件頭」，捧餐時「糯吓糯吓」，哦，個 captain阿 sir解釋，原來嗰班係「學廚」嘅學生，怪唔之啦，梗係試食得多，個個都咁「大咪」，班學生唔係好熟讀 menu，英文唔得，我叫杯 Screw Driver，聽唔明就閃咗去，依然俾番之前杯 Long Island Ice Tea我，唔緊要啦，我對學生嘅包容度好高嘅。
第時畢咗業出嚟喺各大食肆搵食餬口，我唔飲至寶三鞭酒，都鞭到你暈呀。做嘢梗係要認真，即使係靈界美食都有要求，七月十四，盂蘭節，整咗個精緻便當，益吓啲餓鬼！
「卡樂Ｂ之父」慶祝抗戰勝利
各界慶祝抗戰勝利七十周年，八月二十六日喺會展舉行酒會。雖然喺舊翼，但場面相當墟冚。然而大會由四洲集團之戴德豐做主席，則又不無諷刺。
戴先生係全國政協常委，愛國資格毫無疑問。戴先生靠乜起家呢？佢有個稱號叫做「卡樂 B之父」，咁唔係話佢發明卡樂 B。呢種零食首先喺戰後嘅日本面世，到咗七十年代戴先生方將之引入香港。正正因為推銷日本產品得力，故此佢先後獲頒日本第三十屆食品產業功勞賞及日本政府農林水產大臣獎。
戴先生做生意嘅眼光毋庸置疑，搵佢擔大旗慶祝抗日戰爭勝利？ Well，我哋唔識得講啦。
茅台變花雕
大陸打貪，影響深入各個層面，睇中秋節 hamper就知；呢款四季酒店最頂級 hamper為$13,888，聽講恒基太子爺李家傑訂咗唔少呢款送予國內友好，鮑魚、花膠必備外，仲有支……唔係茅台，而係釣魚臺嘅紹興花雕酒，自從前廉政專員湯顯明向國內官員送茅台而惹上官非，商界都引以為戒！
上週人語揭曉
答案：(A)荷李活道
得獎者：葉劍鋒
中獎時間： 1:00pm 26/8/15
|
鍾意就快D Share啦！
|
|
|