高清低智
我係《乜乜華》
《收規華》是一部誠意之作。
首先，它大膽披露殖民地時代警察收黑錢的腐敗。下一次，應該整番套特區警察捲入桃色案的《偷窺華》；中港一體，還有揭發大陸貪官的《雙規華》、《收窺城管》有排拍，夠吉士嘅話。
宣傳片煞有介事講解咩叫「溫心老契」、「紅牌阿姑」等等，資料搜集員大概靠睇《胭脂扣》搜集返嚟；街景重現舊香港情懷，其實由清裝劇到六十年代都係同一條布景街，忠於的，是 TVB式史實。
但總無損《收規華》之誠意，它教曉觀眾人不可以貌相。
主線是男主角改邪歸正過程。扮爛仔，張繼聰真一絕，演《踎街華》都仲得！但講到歸正，佢個樣何曾「正」過？參考往績，由劉德華黃日華任達華吳啟華擔綱才對，靚仔令觀眾又愛又恨，張繼聰只做到後兩粒字。
而這正正是 TVB的教育功能——邊個話大台劇情估到晒？我作為電視散戶（間中瞄吓），早前睇《水髮胭脂》陳豪力溝蓋鳴暉，會以為陳豪是否在淘古井？估佢唔到，原來蓋鳴暉真係顛倒眾生。
顛倒呀！ TVB究竟幾時嚟真？
撰文：余家強
nextplus.nextmedia.com
|
鍾意就快D Share啦！
|
|
|
