【太陽報專訊】今年無綫視帝視后之爭戰況激烈，三奪視帝的黎耀祥有兩套台慶劇在手，與在劇集《梟雄》合作的影帝黃秋生力爭視帝，另一視帝級好戲之人歐陽震華黃雀在後，形成三強鼎立局面。至於視后之爭則落於田蕊妮、陳凱琳及萬綺雯身上，與阿田在劇中玩「神同步」的胡定欣，更勁Buy阿田再奪視后！
無綫一年一度的台慶頒獎禮將於今年年底舉行，今年的視帝視后之爭勢成熱話，已三奪視帝的黎耀祥今年「起雙飛」有兩套台慶劇揸手，分別是《梟雄》及《無雙譜》；至於不是無綫親生仔的影帝黃秋生跟黎耀祥齊齊在《梟雄》中大鬥演技，加上在《東坡家事》擔正的歐陽震華（Bobby）實力超晒班，三位視帝大熱攜手掀起一場龍爭虎鬥！
擔心分薄票源
已第六年在台慶劇擔正的黎耀祥坦言，今年視帝之爭形勢激烈，擔心自己有兩套劇角逐視帝不是好事：「今年形勢幾妙，大家都有咁上下資歷，我同秋生、湯鎮業三個有唔同背景，唔同感覺，唔同化學作用撞埋，真係好好睇，秋生係一個好勁嘅演員，咁外援好似黃子華咁，都攞過視帝，所以今年形勢都幾刺激，而我有兩套劇喺手，但其實唔係一件好事，會分薄票源，而《無雙譜》個角色都幾過癮，不過講到戲味，咁就《梟雄》比較濃。」
睇好《梟雄》
而秋生睇好黎耀祥攞視帝：「戲就大家都咁好，祥仔喺電視度撈，我又唔係TVB人，畀個獎我我都唔會拍多兩套劇我好希望祥仔攞到，因為祥仔好好，我建議佢抄吳鎮宇，癲癲哋咁，我個角色就老啲，同埋如果祥仔攞到，我唔使請食飯嘛！佢攞我又有飯食，而且佢係無綫人，我都會投佢一票，我主力支持祥仔。」
至於《梟雄》監製王心慰則坦言，以往從未拍過如此貴的劇集，問到有否信心奪最佳劇集獎，她說：「講真，呢套係拍咁耐劇以嚟，最有質素同最貴嘅，仲有三個老戲骨黃秋生、湯鎮業、黎耀祥，有實力嘅對手拍嘅時間都唔衰得，有好多火花。」
與黎耀祥合演《無雙譜》的田蕊妮（阿田）則有機會憑劇中角色冧莊入圍爭視后，與近期極速上位的前港姐陳凱琳（Grace）及萬綺雯力爭視后寶座，而在早前熱播劇《鬼同你OT》與阿田「神同步」的胡定欣亦力推阿田做視后！
問到今年有否信心冧莊視后，阿田表示今次劇中角色對她來說是很大挑戰：「喺劇中一人分飾兩角，一個男一個女，做兄妹，係神幻魔幻題材。（亦男亦女難做？）唔止一人分飾兩角，因為哥哥離鄉別井，阿妹仲要扮阿哥住喺城入面。從未試過咁棘手，演嗰時要分得好清楚。」提到胡杏兒與無綫已無約在手，刻下主演《張保仔》的Grace為最大勁敵，阿田說：「視后唔係睇對手，係睇自己表現，要不停超越自己，唔係贏人哋，唔諗視后住。好似《鬼同你OT》咁，有兩套一人分飾兩角嘅劇都好過癮！」
陳凱琳壓力大
至於資歷尚淺的Grace則表示有份提名已很好：「心情非常興奮，呢套劇辛苦咗半年，亦好多戲份，大家又拍外景，對我講好有意義。至於成為台慶劇真係壓力大少少，我想平常心面對，盡咗力就得。（有冇信心攞視后？）呢啲嘢唔會諗太多，愈睇輕愈好，愈同人鬥就愈唔開心，對頒獎禮冇乜期望，有得提名、參與已好開心。」
胡定欣勁開心
而胡定欣在《鬼》劇演技出色，被網民睇好奪視后，問到她有否信心時，她說：「依家諗太早喇！其實都唔係關台唔台慶劇事嘅。《鬼同你OT》收視咁好我已經好開心。依家日日都開工，冇諗有冇機會攞獎，年尾先再算」她又表示睇好阿田攞視后。熱門之一的萬綺雯說：「拍嘅時候開心，又識到Bobby、王浩信同陳自瑤已夠好開心，其他嘅嘢我真係冇諗咁多。」
文：專案組
|
鍾意就快D Share啦！
|
|
|