連詩雅遭醫生警告隨時用拐杖
近年愛上跑步、愈跑愈專業的連詩雅（Shiga），早前遠征挪威越級挑戰半馬拉松，雖然完成比賽但卻令招牌長腿受傷，更嚴重到一度要用輪椅代步。日前回港後她急急找骨科醫生求診，見她痛得走路時要一拐一拐，令人看得心酸。同樣將要參加馬拉松賽事的組合Super Girls就無懼受傷風險，繼續落力備戰本周日的比賽。
「街跑風」近年席捲全港，不少圈中人都成為街跑一族。擁42吋長腿的Shiga自從愛上街跑後經常四出練跑，原本只跑十公里的她為了再進一步，決定越級挑戰長達廿一公里的半馬拉松賽，更遠赴挪威參加比賽。為爭取最佳成績，Shiga出發前已加強訓練強度和次數，誓要完成挑戰。
拐吓拐吓睇骨科
最後Shiga成功完成賽事，不過卻因此付出沉重代價。勇戰後，她左腳膝頭背面劇痛兼腫脹，昨日有讀者向本報爆料，前日發現戴黑超遮素顏的Shiga獨自現身佐敦一間骨科診所求診，她在診所內要慢步一拐一拐的出入醫生房，而且不時將手放在腰後借力，看來相當痛楚，離開時更手執一大包藥，我見猶憐。
事後Shiga接受電話訪問時承認在挪威勇戰受傷，她說：「完成賽事嗰刻好開心，完全感覺唔到腳痛，但隔咗一陣冷靜番就覺得左腳好痛，而且膝頭後面嘅筋腫到一個雞蛋咁大，要趷吓趷吓咁行，行動好唔方便。」回想受傷過程，Shiga稱應該是死頂所致：「跑到十四、五公里時，隻腳突然痛到想撕裂咁，開始趷吓趷吓，但見到隔籬啲公公婆婆咁大年紀都咁犀利，就覺得我一定要得，跟住就一直衝。」
負傷的Shiga返港途中，感到腳痛加劇，到芬蘭轉機返港時更需用輪椅代步：「因為左腳整親，我放咗好多力落右腳度，肌肉痠軟晒，好難行路，同事就推我，諗住芬蘭冇咩香港人冇所謂，但返到香港就繼續趷吓趷吓。」問現在傷勢如何？她說：「醫生話我關節膜發炎，腳筋同肌肉勞損，而依家左腳啲肌肉腫脹。」醫生更告誡她暫時要停跑：「佢話如果繼續操勞，唔畀對腳休息，可能我到三十零歲就要用拐杖。」她又稱將要飛澳洲為師兄周柏豪的演唱會任嘉賓，故會把握時間好好休養。
想唱快歌跳勁舞
另外，早前Shiga舉行新碟簽唱會，獲贈蛋糕做禮物以配合其新碟碟名《大了一歲》，粉絲亦特意準備了金唱片祝她的新碟大賣。問到若銷量報捷會如何答謝粉絲？她說：「希望可以開演唱會，不過想再儲吓歌先，希望呢一、兩年會開到！」她又謂過往唱慢歌為主，有意嘗試唱快歌挑戰跳舞：「叻就唔係好叻，但我相信將勤補拙，好似以前我都會覺得自己跑唔到步，但都可以慢慢去磨練。」
文：音樂組
|
鍾意就快D Share啦！
|
|
|