甄詠珊被罵正龜婆 嬲爆報警
前組合Freeze成員甄詠珊昨日為車資問題而在微博怒轟的士司機，指平時40元的車資疑因司機兜路變成了79元，更聽到司機鬧她「正龜婆」，令她嬲爆並報警處理！
前性感女子組合Freeze成員甄詠珊，昨日在微博大動肝火，指前日被的士司機濫收車資，落車時更聽到對方鬧她「正龜婆」，嬲爆的她表示已報警處理。事緣，甄詠珊前日由太子搭的士往位於九龍站的圓方：「坐過無數次車費都係40蚊左右，但前日該程車資，收費錶卻跳至79元，車資多近一倍。」故質疑司機兜路。
自認平日EQ非常高的她在微博寫道：「非常極度超級爆嬲，簡直唔可以用嬲呢個字嚟形容，警就已經報咗......我一直唔敢出聲，因為驚畀人掉落車，所以一直忍，終於到咗我就講你兜路喎，唔好當我係遊客」之後她又再發文謂：「當我落咗車，我好清楚聽到佢鬧我正龜婆。嘩，你哋話我係咪要爆？」
辯稱有權揀路跟錶收
甄詠珊不但一連發了3則微博怒轟司機，更公開的士司機樣子及司機證，又將事發所拍的短片上載到網上。片中聽到甄詠珊不斷質問司機有否兜路，更表示司機不回答便不落車：「即係油麻地去尖沙咀要80蚊？你講呀，你有冇兜路？你講！」而司機則謂：「我唔需要答你呢個問題，我照錶收。」又自稱是職業司機，有權選擇行車路線，反指甄詠珊沒有出聲異議。甄詠珊即激動反擊：「你冇問我呀！」最後司機就拋下一句：「你投訴啦，你有咩可以去投訴，我打定張單同警察解釋！」
勸政府正視行業獨大
甄詠珊昨日接受本報電話訪問時，肯定對方不是鬧她「八婆」：「佢個嘴形都係龜字。」當日要去飲宴的她，驚會飲酒所以選擇不駕車而搭的士：「我都明白司機要搵食，但最大問題係態度，真係好嬲！所以今日（昨日）中午打電話報警。平時我揸車去圓方，係經彌敦道去塘尾道，但今次個司機係行界限街，跟住又再由海港城嗰邊轉去圓方！」而她今次將事件擺上網，是希望政府正視的士獨大問題：「我唔係第一次遇到。其實我都諗緊告唔告，唔係想罰佢啲咩！我都有遇過好嘅的士司機，落車有畀100蚊獎勵。」經過今次不愉快的士糾紛後，昨日甄詠珊選擇「自駕遊」，在微博分享於車內的自拍照留言：「無懼影響心情，今天自己開車！」
文：專案組
|
鍾意就快D Share啦！
|
|
|