張智霖(Chilam)向來都是愛車之人，今日又出動到銅鑼灣Bentley(賓利汽車) 陳列室看車，不過同行嘅唔係一班汽車發燒友郭富城、沈嘉偉同余文樂，而係老婆袁詠儀(靚靚)同8歲大嘅囝囝張慕童(魔童)，趁假日陪伴屋企人。
今日下午三點幾，記者發現Chilam一家三口同蔡一智同太太周雪芳同9歲大囡囡蔡斐嵐現身銅鑼灣利園附近，一行六人小心翼翼過對面馬路嘅Bentley陳列室，Chilam同阿智帶埋兩位小朋友入內，而兩位太太就喺門外等候，自顧自傾偈講電話，免入男人天地。銷售員見到「大客仔」Chilam即上前殷勤招呼，同Chilam一齊研究各款車嘅外型及性能，見Chilam邊行邊點頭，好細心聆聽，睇嚟又想買新「玩具」；至於「冇人理」嘅阿智顯得有啲無癮，惟有幫手睇住兩位小朋友，等到攰就獨自坐低休息。
雖然Bentley陳列室內全部係貴價靚車，價錢由三百萬至逾千萬元不等，但魔童同嵐嵐只顧玩得開心，當正陳列室係遊樂場一樣，由一架車跑去另一架車，又輪流坐上司機位，魔童更於司機位爬過另一個坐椅，相當活躍，兩位星爸亦容許小朋友慢慢「試車」，銷售員當然不敢多言。
約半小時後，Chilam發現記者後有啲掃興，即叫店員打開側門等佢哋離開；魔童對鏡頭明顯有啲怕羞，等車期間輪流攬住爸爸媽媽撒嬌，靚靚更將囝囝緊緊擁入懷中，怕容貌曝光。之後兩個家庭各自乘車離開，臨走前Chilam同蔡一智亦禮貌地向記者「say goodbye」。
| (攝影﹕徐錦池) |  愛車之人Chilam又去睇靚車! |  不過今次係同囝囝睇 |
 仲有蔡一智9歲大囡囡蔡斐嵐 |  兩個星星家庭 |  靚靚攬實囝囝唔想佢樣貌曝光 |
 兩個小朋友喺陳列室跑來跑去 |  魔童仲坐上司機位 |
|
鍾意就快D Share啦！
|
|
|
