高清低智
論氣派
曾有資深監製告訴我，點解拍唔番武俠經典？「九大派掌門人，戲份不多，但位位要具備高手氣派；現在有氣派的藝員湊唔夠數。」
其實何止配角，主角更欠氣派，上樑不正下樑歪，下把比上把仲似大俠，會不成戲的。
氣派並不抽象，有諸內形諸外，最直接是錢，人到富裕膽自大。 TVB公布盈利上升 60%，眾所周知，幾百萬眼睛注視的藝員，底薪依然那麼卑微，向上司搖尾乞憐，又何以令觀眾聯想出瀟灑的楚留香、狂傲的楊過？
辯護式講法，無綫提供了成名平台，藝員自能搵外快賺夠——喂，哪有一門生意如此鼓勵員工兼職仲要被抽佣的？
藝員低薪由來已久，但扣除通脹，八十年代還是較今日高，五虎不會整天呻窮，窮也別俾人知，這才是夢工場的道德，這才是氣派。
你未聽過掛在口邊阿諛奉承何家聯、馮美基（當年藝員主管）；如今的乜姐、乜小姐卻似對被群星膜拜樂在其中，都係嗰句，上樑不正下樑歪，誰之過？
擦鞋，大概像博弈論的囚徒困境：①一同不擦鞋，一同保持尊嚴；②你不擦、人擦，機會便歸於人家了；③惟有個個都擦鞋，又變回機會均等，於是要外加送禮給上司，隨時得不償失——困境在，這已經是最優策略。難道你相信大家會齊心拒絕嗎？
係，因為早年冇狗仔隊、冇咁鋪天蓋地的娛樂新聞，觀眾無從獲悉內情，不代表早年冇；無知是福，時下的主管、藝員只不過唔好彩、見光死。然而，亦全賴廣泛報導，讓觀眾知道尚有特立獨行的清高者（例如陳國邦）。可惜，清高者通常是不擦鞋的輸家。清高也屬於一種氣派，但難覓平台。
湯鎮業和黃秋生擔得起梟雄之名，只因上了岸，唔志在。
撰文：余家強
|
鍾意就快D Share啦！
|
|
|