（《蘋果日報》圖片）
探熱針
前夫澳門頹賭 何嘉莉冚密再嫁
與前夫 King黃逸璋（ King）去年十月公布離婚，事隔一年，何嘉莉再嫁！上週三（ 18/11），閃嫁機師男友 Gerald Sze，由於不想觸動前夫神經，對再婚一事，何嘉莉極為低調。
原來早於 13年底，何嘉莉和 Gerald已經撻着， 14年初與 King協議離婚後，更火速與新歡同居。
前妻嫁咗人， King單拖到澳門賭錢，輸清頹爆！
保護現任
上週三（十一月十八日），何嘉莉在淺水灣酒店舉行婚禮，與機師男友 Gerald結婚，再逢第二春，何嘉莉秘而不宣，一切低調進行，出席當日婚禮的圈中人，只有好姊妹黃伊汶夫婦、谷祖琳及生意夥伴 Moiselle太子爺陳柏熹。
「嘉莉只係同幾個好朋友講咗佢會結婚，突然爆咗出嚟，佢都好緊張，唔請圈中人大搞，係想保護阿 King，佢始終唔係圈中人，嘉莉擔心前夫私生活受影響。」何嘉莉身邊人說。
○六年，何嘉莉與發記甜品太子爺黃逸璋（ King）結婚，婚後恩愛，去年十月驚爆離婚，當時何嘉莉更表示於年初已與兒子 Jean搬離愛巢。
結束九年婚姻，原因是性格不合，生活理念有分歧，但據了解，早於一三年底，何嘉莉已撻着機師新歡 Gerald，只是 King一直蒙在鼓裡。
「佢哋係响一個朋友聚會度認識， Gerald對嘉莉完全係一見鍾情，就算明知對方結咗婚有個仔，佢都照採取攻勢，佢對嘉莉好細心，係乜都就晒嗰種，同 King火爆性格根本兩種人！」
嘈交掟嘢
事實上，何嘉莉同前夫同樣火爆，結婚頭兩年甜蜜期過後，兩人開始經常有爭拗，一二年兒子 Jean出世，二人關係一度有改善，可惜最終仍是離婚收場。
「佢同 King真係嘈交多過食飯，有時嗌到火紅火綠，就喺屋企係咁掟嘢！個仔出世後，佢兩個都有盡量克制，大家關係都有好轉；但嘉莉事業心太強，生完冇耐就出番嚟同 Moiselle太子爺陳柏熹合作搞時裝店， King喺糖水鋪收工返屋企，嘉莉已經出去返工，兩公婆生活作息時間完全顛倒，見面時間好少，兩個人亦無話題，愈來愈難相處。」知情者說。
Gerald的細心遷就，亦加速了何嘉莉決心了斷和前夫關係。
「雖然同嘉莉有咁多磨擦，但 King其實唔願離婚，但無論佢做乜，都修補唔到，最後亦只有接受。」
頹爆賭錢
協議離婚後，即使手續未正式辦妥，何嘉莉已極速帶埋兒子搬走，與 Gerald在大角咀同居，雙方更一度為兒子撫養權爭拗。
「 King嘅父母好錫粒孫，初時點都唔肯俾個孫仔跟嘉莉，但 King知道個仔好黐媽咪，最後都幫口勸掂父母俾 Jean跟嘉莉住，條件係要定時定候，帶 Jean返嚟見爺爺嫲嫲。」知情者說。
何嘉莉爆出再婚消息，失婚的黃逸璋就頹爆寄情賭博。早前 King被發現在澳門威尼斯人玩德州撲克，凌晨十二點玩到三點，輸咗唔少錢；原本戴住眼鏡集中精神賭錢的他，其間除低眼鏡，冇厘心機托住頭，對前妻離婚一年再嫁，大受打擊！
英皇小花
曾是「英皇三小花」的何嘉莉，是公司力捧對象之一，其後有傳她唔聽老闆話，又搭上髮型師 DY（余勝友），終日掛住拍拖無心戀戰，結果被雪藏更一度放逐到台灣。 02年，何嘉莉主動向英皇提前解約，轉到幕後做形象設計； 06年與發記甜品少東黃逸璋結婚，正式退出娛樂圈做少奶奶。
冇得爭
夫妻離婚，要爭子女撫養權的話，每每訴諸法庭，目前政府計劃改例，以離婚夫婦皆有共同責任照顧孩子，去除昔日有關子女管養權及探視權，減少雙方爭拗對下一代造成的傷害，並確保雙方家長的責任。
撰文、攝影、攝錄：娛樂組
|
鍾意就快D Share啦！
|
|
|
