熱爆娛樂: 落腳 J2　《靚聲王》變韓國 K-POP [壹週刊

2015年11月26日星期四

落腳 J2　《靚聲王》變韓國 K-POP [壹週刊 - 1342] __,M1,

娛樂偵訊

落腳 J2　《靚聲王》變韓國 K-POP

無綫的《 Sunday靚聲王》就算製作慳皮，但合師奶口胃，做到平均二十點，最高廿五點收視。節目將由翡翠台搬去 J2台，「轉台」第一步是要洗走汪阿姐同秋官的老陳皮味，由布景到打燈，都學足韓國節目《 K-POP》。抄俾人笑唔抄又俾人笑，唔抄就笨！

落本照抄

《 Sunday靚聲王》收檔，溫拿五虎做嘉賓錄影最後一集後，節目會由 J2台接力，名都唔改，沿用《靚聲王》原汁原味。《靚聲王》「過檔」 J2，即刻後生晒！由巨聲幫林師傑和譚嘉儀化身成年輕版秋官、汪阿姐做主持，製作亦會落重本，唔似之前咁慳皮。

據悉，年輕《靚聲王》的舞台布置抄足韓國《 K-POP》，以多面 LED wall加強燈光效果。上週打頭陣做節目的巨聲鐵腳許廷鏗、胡鴻鈞、釗峰、蔚雨芯及女子組合 A2A，去到現場見到個 set，都嚇一跳。

「大家都冇諗過公司今次咁落本，以為會好似之前翡翠台嗰個咁，求求其其，點知原來咁認真，學晒《 K-POP》。抄都好，起碼成個製作 upgrade咗！頭四集釗峰同蔚雨芯會做埋嘉實主持，唔再好似以前咁，只係自己人玩晒。」一名無綫人說。

新的《靚聲王》下月在 J2台出街，為洗走舊有娘味，由布景到燈光都抄足韓國《 K-POP》。

新一輯《靚聲王》唔再係六、七、八十年代歌手天下，取而代之是年輕一班。打頭陣一集便有孖女組合 A2A及蔚雨芯。

MV翻生

月前余詠珊與坐正無綫唱片部的老公何哲圖搞破冰飯局，席間向在座各唱片公司高層作出口頭承諾，指無綫會重啟大門，寬待其他唱片公司歌手。

所以，除了 J2《靚聲王》讓其他唱片公司歌手輪住做客席主持及表演外， J2原有的節目《 Music Café》，亦會廣發英雄帖，歌手要亮相大台，唔使再睇面色，輪街症等餐死。

J2台陸續加料炮製新的音樂節目之餘，停播四年、專播 MV的節目《 360°音樂無邊》亦會翻生。

「會做番 MV節目，不過公司就唔會再花錢幫歌手拍 MV，而係唱片公司自己提供。都好呀，起碼歌手多咗個平台，觀眾亦多咗嘢睇。聽講 Sandy（余詠珊）已經開始同各大唱片公司傾緊搞音樂特輯嘅合作，不過係啲一、二線歌手先有份。」一名無綫工作人員說。