探熱針
洗米華瞓身支持 Mandy一月驚喜復出
Mandy Lieu介入澳門賭業猛人周焯華（洗米華）的婚姻後，因為忙於以陪住男友周圍飛為己任，絕跡公開活動。
近日好友李月預告 Mandy聖誕節會帶埋 B女回歸香港，並落實明年一月與公司旗下韓國新女出席美容活動，作為復出頭炮，當事人更講明有驚喜。有指周焯華為支持二廠，出錢出力，任用！
宣示地位
成為周焯華二廠後，過去一年， Mandy Lieu絕跡公開活動。今年五月誕下洗米女，就算光速修身，依然留守英國湊 B。但據悉，事業心重的她其實早於數月前開始部署復出，為迎接 Mandy Lieu回歸，近日周焯華更加碼，讓她旗下的 model公司簽下曾拍韓劇《 Oh My Lady》的韓國小姐鄭妍之，省靚公司招牌。
據了解，明年一月， Mandy Lieu會以老闆娘身份，孖住旗下新女鄭妍之，現身代言的「 THE ONE」壹美健醫療美容首個宣傳活動，順理成章作為復出頭炮。推介公司新將只是點綴，主菜是離開基地一年多的 Mandy Lieu，藉品牌「 THE ONE」宣示地位，非常霸氣！
復出價五十萬
本月初，周焯華被「隊」爆同貌似謝安琪的新歡 Meko坐私人飛機去首爾後， Mandy Lieu打爛醋埕，為氹番二廠，周焯華未做完嘢，都要撲飛英國「救火」；今次為 Mandy回歸，周旋於正印與二廠之間的周焯華更加不敢怠慢，不單出錢，還出力全面配合。
「其實之前有幾間公司搵 Mandy復出，最後佢揀咗韓妹代言嗰間，收五十萬復出價，錢其次，因為佢覺得品牌個名好啱佢，覺得自己係華哥（洗米華）嘅 The One（唯一）。華哥俾錢佢開咗間 model公司冇耐， Mandy就有咗，所以好多 project都 hold住晒，而家生完女， Mandy會慢慢睇番住佢打骰嘅 model公司，有華哥條水喉撐住，大把嘢搞。」知情者說。
預告有驚喜
對於 Mandy Lieu現身醫學美容活動作為復出頭炮，品牌負責人馮小姐承認此事。
「我哋同 Mandy合作咗好多年，佢當日開 model公司，我哋都好 support佢。當我哋想搵韓國 model，佢俾咗好好人選我哋。嚟緊推出呢個品牌，我哋有同 Mandy傾過，大家都覺得一月係好好時機，因為佢會全面復出。頭炮傾緊點合作， Mandy話會全力配合。」
問到有傳周焯華會現身 Mandy的復出活動，馮小姐說：「一月個 event， Mandy話會有 surprise。」
配合老闆娘 Mandy Lieu出山，韓國小姐鄭妍之上週為代言的品牌拍宣傳照，半裸上陣浸奶浴，性感爆燈，表現拼搏。
對於有老闆娘復出傍住造勢，鄭妍之說：「 Yes, I want to see her. I want to meet her.」
新女有銜頭
被 Mandy Lieu睇中的韓國新女鄭妍之，在韓國發展時叫鄭睿智，一○年曾客串崔始源做主角的韓劇《 Oh My Lady》，一二年參選韓國小姐獲最受歡迎及地區「仁川」美獎，同年再拍劇《 But, still you》，並擔任節目主持，訪問過《 Running Man》成員。現年廿七歲的她，今年轉戰香港發展。
洗米華全力以赴
周焯華照顧女人一向全力以赴，錫住正印陳慧玲，對女友 Mandy Lieu亦全面侍候，無論工作或旅遊，均有五星級服務，做到最好。
蜜遊澀谷
今年 4月 Mandy Lieu臨盆在即，照陪飛東京澀谷，二人更在商場吃雪糕，儼如小情侶。
湊女出院
同年 5月，周焯華飛倫敦陪 Mandy生 B，又親自接母女出院，做到足。
撰文、攝影、攝錄：娛樂組
|
鍾意就快D Share啦！
|
|
|
