黎燕珊同吳綺莉今日喺荃灣齊齊以谷胸晚裝現身，出席佢哋主持嘅有線節目《往事‧並不如煙》(第二輯)記者會，吳綺莉為節目勁罕有咁晒4吋事業線，真係博晒命，同場仲有趙頌茹(Yu)同艾威，兩位喺節目分別演繹川島芳子同中國特務戴笠嘅愛情故事。
珊姐表示今次碌盡人情卡，邀請陳玉蓮、金燕玲等暢談愛情經歷，喺精華片段中，金燕玲指:「我冇諗過最後會同女人一齊。」陳玉蓮則會大談周潤發。
珊姐同吳綺莉透露喺節目入面，亦會分享自己嘅愛情觀同感情經歷，問到會唔會重提同成龍嘅一段情﹖吳綺莉話：「唔係重提同佢嘅感情，係我對感情嘅睇法、自己經歷同過去，今次亦好難得著咁多靚裙，大家識我咁耐都好少見我著成咁，拍呢個節目要著旗袍、婚紗，o依家又要著晚裝。」珊姐就表示喺第一輯已講晒自己愛情經歷。
至於有指Yu演繹川島芳子時爆喊﹖佢話：「唔係抽離唔到，我係由朝早化完妝就一直拍喊戲拍到傍晚六點，當中亦有發爛渣嘅激動位，好少可以拍到呢啲戲。」艾威透露同鍾慧冰囡囡有對手戲，當中一個四目交投嘅戲份，佢笑住話有觸電感覺，問佢要唔要同太太備案﹖艾威話：「唔使，又唔係電到入院。」
|
鍾意就快D Share啦！
|
|
|
