賀父94歲生日6,900萬買名畫 超盈搞博物館圓賭王心願
賭王何鴻燊昨日94歲生日，二、三、四房車輪轉為他慶祝，四房梁安琪前晚飲頭啖湯率領四名子女低調BBQ慶祝，及玩創意送上韓國新潮3D立體裸女畫，等賭王做運動時奉旨贒女，而超盈日前在北京亦以6,900萬人仔接過早時拍得的吳冠中名畫，計劃擺放在明年開辦的博物館，接棒賭王愛將藝術共分享的宏願。
賭王何鴻燊昨日94歲生日，二、三、四房一如過往為他慶祝，各房為免賭王舟車勞頓應酬勞累，都不會大肆鋪張，如飲頭啖湯的四房梁安琪前晚就在淺水灣4號大宅搞BBQ，宴請摰親好友出席，昨日正日就輪到二太藍瓊纓及子女超瓊、超鳳、超蕸、超儀及猷龍在谷柏道大宅食晚飯，簡單兼溫馨。
【四房全家】
■四太梁安琪前晚率先為賭王慶祝生日，與四名子女齊齊整整切蛋糕，賭王笑得精靈。
【深情肉咀】
■四太向賭王送上「肉咀」賀壽，二人啜得肉緊。
■賭王昨晚正日生日與二房慶祝。資料圖片
𥄫裸女畫做運動
四太梁安琪前晚在BBQ生日會中，如常送上「肉咀」賀壽，四名子女超盈、猷亨、猷君及超欣齊整列陣一齊切蛋糕外，四太更搞新意送上3D裸女畫，開綠燈讓賭王做運動時奉旨𥄫女，認真有情趣，難怪賭王笑逐顏開。代母買畫的超盈昨日接受本報電話訪問表示：「呢幅唔係乜名畫，係立體3D畫，每一個角度唔同，一時係盆景，一時係裸女，呢幅畫唔在於價錢，係心意，亦唔係投資，想我爹哋做運動多啲情趣。名畫爹哋有好多，韓國新式藝術畫佢冇，擺喺屋企運動房做吓運動開心吓，幾好玩。」
四太梁安琪有創意兼新潮，原來她早前以神秘買家身份，以6,900萬人民幣高價投得當代畫大師吳冠中的名作《木槿》，同時刷新吳冠中的油畫拍賣價格紀錄，超盈於剛過去的周日現身北京保利的接收儀式。四太昨回應投得名畫一事時說：「係我個人投資，𠵱家喺澳門有一個展覽藝術館項目、地點暫時保密，預計明年第二季落成，到時會展出。一向覺得吳冠中嘅畫值得珍藏，早一年想投佢另一幅畫，但價錢太高投唔到，唔係純以投資角度買，藝術係無價，買藝術品唔係一定要賺錢，係以欣賞角度出發。」四太更表示構思買《木槿》是超盈的主意。
【《木槿》 6,900萬人仔】
■超盈星期日到北京出席吳冠中名畫《木槿》接收儀式。《騰訊娛樂》圖片
【《長江三峽》1,180萬】
■今年4月，超盈已用了1,180萬投得吳冠中另一名畫《長江三峽》。
「平等享受藝術品」
其實超盈今年4月已經以1,180萬買入吳冠中另一幅《長江三峽》名作，今次再投得另一名作大表興𡚒，她說：「好欣賞吳冠中大師，呢幅畫係佢生平其中一幅最珍貴、有代表性作品，媽咪同我一樣好鍾意呢幅畫。」超盈透露買藝術品是想延續賭王的藝術夢：「我哋想推動澳門藝術文化產業，買藝術品為辦博物館準備，收集好嘅畫唔好流外，一啲好作品要留喺國家、留喺澳門，都係爸爸心願，當年爸爸投得圓明園銅首，都捐畀保利博物館，所以唔好focus落價錢，何超盈用幾多錢買咗呢幅畫，而係我哋揀咗一幅藝術品，keep喺中國、澳門，做博物館令到每個人都可以平等享受同接觸呢件藝術品，大家都有機會睇。」
採訪：唐如
【韓國3D裸女畫】
■超盈代母買了一幅韓國3D立體畫給賭王做生日禮物，不同角度分別會顯現盆景及裸女，認真有情趣。
|
鍾意就快D Share啦！
|
|
|
