待嫁新娘子賈曉晨(JJ)上周被爆與拍拖三年「力王」男友樊少皇入紙註冊結婚，兩人經歷過無數次分手，又復合，終於修成正果。JJ今日喺九龍塘法國婚紗公司接受《蘋果》專訪，深情剖白自己同「力王」一段情，JJ自爆拍拖期間常被人指罵係小三，又話佢哋令樊少皇前女友陳少霞斷水斷糧，JJ話好冤屈﹕「其實都係佢細個爸爸教育方式唔好，其他小朋友玩，佢就只可以打功夫，結果廿幾歲都未談過戀受。啱啱發育，仲咁大隻，男仔梗係需要，唔畀佢拍拖咪做錯囉。」
結果樊少皇因為一夜情搞大咗陳少霞個肚，女兒已經18歲大，JJ話﹕「佢哋雖然冇感情基礎，但之後都有住埋一齊，唔小心又生咗第二個(細仔13歲)，其實佢份人好單純，好有責任感，從來冇叫人落咗小朋友。」咁杭州助手喺咪女友？JJ再替樊少皇解話﹕「分手後佢都係一個男人，都有感情需要，你問我佢有冇做錯？我會覺得大家都係成年人，要錯就雙方都有錯，只係中間處理得唔好。」
因為太多是是非非，JJ自爆屈出抑鬱病來，佢話﹕「佢乜都唔同我講，每次都係雜誌出咗先講。我哋嗌過無數次分手，但本身感情冇問題，後來經歷太多嘢，我有嘗試過自殺....好多次，試過食藥，最嚴重一次係喺朋友圈寫住『再見嘞大家，幫我照顧我爸爸媽媽』，嚇到班朋友衝晒埋嚟救我，當時我諗住跳樓。」
年半前JJ開始尋求精神科醫生協助，現在情況已經好轉，JJ笑笑口話﹕「食咗一年精神科藥，我發現好好，食完遇到乜唔開心，笑吓就過咗去。依家停咗藥半年，調理好身體準備生BB，再遇唔開心，就諗番食咗藥嘅感覺，等自己唔好轉牛角尖。」
|
鍾意就快D Share啦！
|
|
|