羅家英同汪明荃講，「何況梁系已飄蓬葉落，你明白的」，說的是無綫電視製作部戲劇製作總監梁家樹。大公司權鬥，是常識。何況依家梁家樹已不在其位，家陣大鬥法嘅，係余詠珊同曾勵珍大鬥法。
之前已盛傳綜藝科製作資源總監余詠珊將空降戲劇製作部，戲劇製作總監曾勵珍反遭削權為顧問，不過無綫已馬上否認，但就傳出行政總裁李寶安下令重整戲劇組，李寶安就用「優化」嚟形容，更點名要升職快過直升機嘅助理總經理杜之克同余詠珊聯手，幫助「優化」。
余詠珊本身係管綜藝節目，依家李寶安俾埋位佢幫手「優化」，當時得令，更不斷搵番佢嘅前有線愛將過檔無綫，包括黃翠如、洪永城、區永權、衛志豪、陸浩明，近日又喺有線撬走李潤庭。
《蘋果》收到消息，余詠珊邀李潤庭過檔，主要安排佢主持出年一月改革嘅《東張西望》，安排佢同陳貝兒等前有線人及同何傲芝傳過緋聞嘅林溥來坐堂做主持，踼走陳倩揚、黎芷珊、麥雅緻等一班無綫舊人，而容羨媛就調佢去外景。
聽聞《東張》除朱凱婷同宋熙年可以留低外，其他幾乎無一可以「生還」，包括林映輝及蓋世寶等一班外景主持，據知亦冇機會留低。而呢班，亦都係近排「被退休」嘅高層彭濟材昔日一班愛將，聽講無綫將安排訓練班藝員上陣拍外景，實行大換血。
陳倩揚接受傳媒訪問時，就表示:「唔好意思，唔方便回應。」黎芷珊亦承認有此事，但因為依家開緊工，不便回應。
講到改革，聽聞其實只係主打做社會時事話題，咪又即係以前余詠珊有份策劃嘅《今日睇真D》咁囉！
|
鍾意就快D Share啦！
|
|
|