榮升李太的胡杏兒，於傍晚六點鐘，身穿白色美人魚婚紗，由五位好姊妹李施嬅﹑胡定欣﹑胡蓓蔚﹑黃智雯及姚子羚陪同下見傳媒，五位姊妹幫新娘子拎住拖尾婚紗，一齊合照影相，並作狀咀嘴。杏兒明艷照人，她身穿白色婚紗襯托鑽飾，包括耳環﹑手鍊﹑頸鍊及鑽戒，並手持白色花球，全程甜笑兼狂晒婚戒，好sweet。問佢今日心情緊張？杏兒：「好開心，冇想像中咁緊張，都ok呀，都好順利。（失眠？）有失眠，兩晚冇瞓，事前不斷叫自己唔好咁緊張，有瞓但瞓唔着，好多嘢諗囉，但今日反而又唔係好攰。」老公Phil講咗乜嘢愛的宣言呢？杏兒起初唔肯講，再問老公講乜令你最感動？佢先話：「都係照顧你一生一世呀，愛你呀，哎呀，好肉麻呀，都係唔好講喇﹗」有冇感動落淚，佢話：「簽紙時有感動，因為讀誓詞時有少少喊，好多長輩喺度。」問佢今晚擺幾多圍？佢話擺56圍。而手上戒指由老公設計，係求婚戒指及結婚戒指合併為一，問佢有幾多卡？佢話：「其實呢啲都係心意同誠意，唔一定計size。」此外，問到今早見佢戴咗勁多金器？佢話：「覺得長輩好錫我哋，自己都好意外，（戴幾多對龍鳳鈪？）有20幾隻金手鈪」會否返圍村擺酒？佢話未知，都要大家商量。咁畀老公幾分？佢再話：「滿分，籌備今次婚禮我哋經歷好多及要作好多安排。」問到花費幾錢？佢唔肯講，係咪近千萬？佢講笑話：「近千萬yen咩，我哋真係未計，不過辛苦老公呀，要努力再搵錢，老公話今次結婚係大出血，好開心。個個都等佢結婚等好耐，相信長輩人情會厚啲﹗」談到造人計劃？佢就話笑晒口：「真係要傾下，結婚會放兩個半月假，籌備婚禮瘦咗，要養肥自己，想要少少二人世界，0依家身份唔同，習慣身份先，今晚會拋花球，已有target，除胡蓓蔚，個個都叫緊糊，好有機會。」杏兒又謂今晚喺蘭桂坊有after party。
|
鍾意就快D Share啦！
|
|
|