對於有指何傲兒(Lily)嘅爸爸想有個超級富豪做女婿，於是極力反對Lily同周子揚拍拖，最終喺3個月前結束「兒子戀」。周子揚仲透露Gigi(何傲兒家姐何傲芝)曾親口提出問佢每月攞十萬至廿萬生活費畀佢屋企。其實上年5月，蕭正楠同何傲芝分手，當時已傳蕭正楠係「提款機」，搞到蕭正楠頂唔順而分手。今日蕭正楠喺油塘出席聖誕活動時，表示有望過下呢段報道，問到當年同何傲芝拍拖，有冇畀過錢？蕭正楠苦笑咁話：「Er……冇呀，其他人嘅嘢唔想答。」問佢當年會唔會好吃力？蕭正楠話：「吃力？點吃力？」有冇要求佢畀錢何家？蕭正楠表示：「嗱，即係咁講，借錢呢個問題，細細個父母已經教落，如果你想借畀嗰個人，除非想同佢絕交、冇friend做，一係就畀，一係就唔借。當然睇番能力範圍內，所以我自己管得好好嘅……啲錢。」咁即係有冇借畀人？蕭正楠依然未有正面回答：「你如果唔想同佢做friend咪借畀佢囉，我都唔建議借錢。」依家唔係借，係畀喎？蕭正楠話：「咁你問番佢比較清楚啲。」當年拍拖嗰陣，有冇俾人問攞錢？蕭正楠似乎唔想提，仲即刻轉話題，笑住搭記者膊頭話：「呀.……今日聖誕節，不如祝大家聖誕快樂啦，好嘛？」
| (攝影：仇志德) |  蕭正楠(左)同何傲芝(右)。資料圖片 |  |
 |  |  |
來源 source: http://hk.apple.nextmedia.com
|
鍾意就快D Share啦！
|
|
|