真人騷
臨時演員都係演員 《警訊》之花 Heliy：我冇諗過紅！
十幾年嚟，都真係第一次專訪臨時演員。
破一次例，情有可原：
邊個叫佢演大胸騙徒演得太深入民心？渾身 MK仙氣也 MK得太入形入格？最誇係問身邊人大台膠劇做到去邊唔識答，佢條爆粗短片竟然個個由頭睇到尾熟知劇情發展：「俾佢鬧到喊嗰個女仔話識咗佢十年吖嘛……」係嘅，我講緊《警訊》之花 Heily， 28歲嘅馬溱禧。
雖則唔係正宗 MK土生土長，渾身 MK味的 Heily都可謂喺 MK界衝出一條血路，成為一朵 MK系奇葩。今時今日公公婆婆小朋友都識佢、高登巴打 fb網民愛佢，連偷 iPhone𡃁模都要抽佢水、喺條街爆下粗都會俾人偷拍擺上網，仲唔係迎來演藝事業嘅第一個高峰？仲唔係有望翻身告別臨記生涯……
Sorry，現實沒有大家想像中咁苦盡甘來咁勵志，就喺訪問前一日， Heily埋位拍緊葉念琛新戲《 PG戀愛指引》，又係做臨記，又係做 MK系女僕，又係為一個鏡頭等成晚，一句對白都冇。我用正常人的思維問她：「失望嗎？」她說一點也不會。
「唔會失望喎！我從來冇諗過會紅、會做女主角，反而慣咗冇人識。做咗十年茄喱啡，事實上就係茄喱啡做咗啲咩唔會有人留意㗎有好多角色你哋唔覺得起眼，但唔代表佢唔需要戲。我哋做臨記嘅，就算行過，都可以有戲，都唔使一定係一碌葛㗎！」
聽完，我固之然諗起《喜劇之王》一開場嗰班喪屍，亦都諗起唔使識做戲都可以做女主角攞飛躍獎嘅陳凱琳。
試想像下，換着俾個大波騙徒角色陳凱琳做，唔好話導演會唔會收貨，大前提應該係冠軍人馬兼嘉穎嫂放唔放得下身段先？所以說，應該要慶幸，因為有臨記，因為有人肯演職業「騙徒」，一切才會變得有趣味。
結婚簽張紙，離婚都係簽張紙！
其實你係唔係真係 MK土生土長？
又唔係，我喺九龍灣長大，爸爸媽媽喺我細細個已經離咗婚，單親家庭嚟㗎。其實我有兩個家姐一個阿哥，但係就同佢哋完全唔似樣，好似執番嚟一樣。我係漏網之魚，媽媽明明紮咗㗎，以為唔會生㗎喇，都唔知點解會俾我偷渡成功……
所以真係一出世就係騙徒，第一個呃嘅係媽媽？
哈哈……係，不過之後爸爸有咗第二個，仲要係媽咪嘅朋友，成件事佢處理得一啲都唔好，同我哋關係好差。之後阿媽帶住我哋幾兄弟姊妹離開屋企，直到幾年前，爸爸中風行得唔係咁好，嗰個女人直情同我阿哥講：「唔使旨意我接佢返屋企吖！你哋幾兄弟姊妹自己搞掂佢！」跟住阿哥就接咗爸爸呢幾年一齊住，家姐結咗婚，我就同阿媽住。
吓？啲劇情咁狗血嘅？
係㗎！好似拍戲一樣！個女人喺大陸嚟，一啲都唔靚，阿爸以前喺《東方日報》做總經理，搵到個錢，佢就叫阿爸買嘢俾佢、層樓又寫佢個名，跟住對住阿爸係一套，對住我哋又一套。我記得中學時我賣舊書，爸爸叫個女人嚟我度幫佢啲仔女買書，佢話喎：「呢啲錢留番嚟養你阿媽」我有出聲㗎，話番佢轉頭：「梗係我養啦，唔通留番俾你養呀！」
咁你細個會唔會出聲？有冇爆粗鬧佢？
細個唔識，再講要出聲都仲有阿哥家姐，幾時輪到我出聲？個女人以前成日同我哋一齊食飯，啲仔女仲要同我讀埋同一間學校添！
咁咪好嬲？
咁又唔會好嬲，唔開心就真嘅。始終爸爸以前對媽媽都唔好，成日打佢，試過打到佢爆肝入急症室！
爸爸咁對你哋同阿媽，哥哥都肯接佢返去住咁好嘅？
始終有咩事，嬲完就算，點都好已經過咗去，始終都係佢生我哋出嚟。
爸爸𠵱家後唔後悔？
我知佢有……佢成日想媽咪去探佢，又問我：「你阿媽好忙呀？掛住打牌呀？叫佢嚟探下我」但係我媽媽咁多年都冇探過佢，佢年紀越大越似細路仔，我有時都會講笑咁講：「你叫阿媽探？唔叫你女朋友嚟探下你嘅？」佢答得好賴皮，小朋友一樣：「我唔記得邊個喇！」
爸爸媽媽搞成咁，你嘅體會係？
婚姻唔可靠囉！結婚簽張紙，離婚又係簽張紙咋嘛！
我鍾意錢，但唔會賺人哋啲皮肉錢。
𠵱家冇拍拖，係唔係做得騙徒多，連男仔都怕咗你？
咁又冇，拍得出嚟就預咗有人睇到㗎又真係對實際生活冇咩影響！
咁啲婆婆見到你，又驚唔驚？
唔會喎，𠵱家啲阿婆好精靈㗎！見到我哋就會問：「啊，你哋又拍《警訊》呀？」佢哋知我哋係拍戲。
點解會入咗呢行開始做臨記？
中學畢業唔知想做咩㗎，咪影下相拍下嘢咁囉，跟住有人介紹，我最先係喺 TVB做特約，拍過《學警狙擊》、《珠光寶氣》、《畢打自己人》……直到六年前，堅哥（《警訊》台柱奸人堅）介紹開始拍《警訊》。
跟住就六年都冇扮過好人？
其實係有嘅……不過真係好少。因為拍俾啲婆婆睇，驚啲婆婆呢頭見到我係壞人，嗰頭又好人，會混淆㗎。全部《警訊》 case都係結咗案嘅真實個案，啲對白都真係我哋喺口供紙度睇。有時啲留言話，白牌車人哋架架三、四十萬，你求其擺架爛車喺度……我哋唔可以針對某啲公司營運模式，唔可以太 detail。就好似人哋明明俾信用卡，我哋要拍俾現金。
有冇唔開心呢？俾人覺得 MK？做騙徒做到深入民心？
我冇所謂，起碼我做到導演要求，大家都知我做咩吖嘛！有好多角色你哋唔覺得起眼，但唔代表佢唔需要戲。我哋做臨記嘅，係人都知你路人，我夠知你行過㗎，但係行過都可以有戲㗎。唔係你想像中，茄喱啡唔係一定係喪屍㗎！我都可以喺後邊撥頭髮講電話，唔使一定係一碌葛㗎！
今日先知，你唔食煙又冇紋身，不過講粗口就真係好熟練？
無事無幹我唔會講㗎，梗係有啲嘢刺激到我。其實嗰條片嗰個女仔，我真係識咗佢十年，但係因為工作有啲嘢，呢幾個星期冇講嘢。嗰晚我幫一班女仔選美做司儀，我冇遲到又話我遲到，我做嘢又俾說話我聽，話點解請埋啲咁 cheap嘅八婆，走嘅時候我有朋友車埋幾個人走，佢又話喇：「人哋有司機，大把錢……佢係八婆都跟佢走。」我至忍唔住出聲。
偷電話嘅 CoCo話你 send過淫媒電話俾佢，又係唔係真？
呢件事我已經交咗俾律師處理，真係唔方便再講。
咁你有冇見識過呢？有啲𡃁模同女仔會出賣自己？
咁多年唔多唔少都見過，但係人哋嘅嘢我無謂評論，人哋咁樣做實有佢哋意思，我冇興趣去考究點解。中間人我真係做唔出，我個人性格有啲衰，人哋啲皮肉錢嚟㗎，我係鍾意錢，但唔鍾意用呢種方法搵錢，做到咁已經好慘㗎啦，做咩仲要食佢哋啲錢？
有人問價，有人抽水，又有爆粗短片俾人鋪上網，你覺得呢啲算唔算成名代價？係唔係事業高峰？
從來都唔覺得高峰過，但係人哋點做我真係控制唔到。其實在此之前我都收過核突相，見唔到頭又見唔到腳，淨係得佢中間嗰個部位……點處理？咪報警囉！
所以你拍得《警訊》多，都學識有咩事都係報警先？
梗係叫我追查點查啫？梗係交俾阿 Sir處理唔係冇用㗎，就算係備案，都係開咗 file，再有同類型同一個電話，警察就會做嘢。講緊如果要告滋擾，就真係收過佢嘅 call唔只一次至可以起訴。
慣咗冇人識，我從來冇諗住要紅。
點都好，大胸女騙徒呢個角色的確令你人氣急升，但係都仲係做電影臨記，對白都冇，有冇失望？
唔會，我從來冇諗過會紅、會做女主角，反而慣咗冇人識。做咗十年茄喱啡，事實上就係茄喱啡做咗啲咩唔會有人留意。我係嗰啲安於現狀嘅人，一直當做戲係興趣，從來冇諗過做到老。其實騙徒又好，茄喱啡又好，唔緊要喎！我覺得現實唔係做戲咁做，咁多年從來都叫做得到人尊重，冇大星恰，冇人扣飯盒，冇人刻薄，其實已經好滿足，所以我鍾意做就去做，從來唔會介意。
咁收入呢？
咁就真係唔夠，就算係一個星前開足三日《警訊》，嗰份錢都唔夠我養家，所以我要投資其他嘢。做 playgroup、賣護膚品、仲有 trading，我都同朋友夾份投資。 touch wood每樣生意我都賺緊錢，叫做搵到啖飯食，又學下嘢，夠我養媽咪，夠我養自己。興趣還興趣，做人都係現實啲好。
一個行行企企嘅角色，你當拍葉念琛做女僕，等出場一下要等幾多個鐘？
唔係咁計嘅……尤其係電影，人哋一定係就個 main（角色）而唔係就我，只有我等人啫。我試過最耐等十八、九個鐘，然後收得三、四個鐘，又返去再等過，做呢行係咁㗎
點解咁鍾意錢呢？
屋企都係其中一個因素，以前爸爸唔俾錢我哋，𠵱家媽媽年紀唔細，我想我喺有能力搵錢嘅時候，盡量都俾最好嘅佢。我唔係要發達，係想滿足媽媽所有需求，想買咩？買想去邊度玩？去頸鏈、手袋全部名牌嚟㗎，我媽媽好潮㗎！我覺得佢以前唔開心，呢幾年我想俾最好嘅佢。
睇錢咁緊，咁你有冇試過俾人呃錢？
有呀，最好笑係中聯辦囉！拍得《警訊》多，現實生活都學到嘢幫到手。拍得騙案多，都知原來咩位踩界至叫騙案。譬如：你可唔可以俾三百蚊我，同你唔俾我就公開你裸照，咁就係兩樣嘢。
咁身邊人呢？有冇試過俾男仔呃？
有一個男朋友，衰到用我屋企地址去借錢……我係得個樣精，人係感情動物嚟㗎，佢話冇錢租屋住，我就幫佢租埋屋裝修買傢俬，跟手就衰喇……佢開始唔返工，幾個月都留喺屋企……見到貨不對辦，我都識同佢分開。但係從來冇追過佢債，所有錢都係我自己無端端自願俾，怨得邊個？
咪即係騙徒？你遇着騙徒都係無端端自願俾錢㗎！
𠵱家諗番起，咪知自己戇居囉……對着朋友都係心軟㗎，冇開工嗰啲我會請食飯，話唔夠錢去旅行，我又會資助。
咁你其實都幾易呃？
係㗎，條數唔大我都諗住大家開心就算。其實我十幾歲開始搵錢，租過檔仔，做過寵物店，學過做婚紗，做過 marketing，然後自己做生意同拍戲……咩都做過，係冇做過騙徒。因為我覺得你做過啲咩，到頭來自己就會受番啲咩。
行「騙」成功
能把一個大胸女騙徒演活，也是一種能耐。不過我覺得 Heily更大的能耐是，既不介意俾人笑 MK格，更不怕在戲外也發揮她的職業「騙徒」功力。
話說影樓就近就有個袋住 28蚊零用錢、全副身家只得 28蚊嘅七歲男童（其實係筆者個仔！）， Heily二話不說就聽我話，又呃又氹又扮肚餓，幾分鐘就氹得男童自動獻上五蚊雞，買包媽咪麵請佢食。
呢包媽咪麵，唔算係騙；呢個騙徒姐姐，我覺得抵請。
女神之路
《警訊》之友
埋位集郵
撰文：朱小博
攝影：范仲良
化妝、髮型： Maggie@Bridal Corner
形象： Bryan@the Flaming
服裝： MZJJ
|
鍾意就快D Share啦！
|
|
|