黎諾懿現為《 ICAC 2016》同《愛•回家》開工，馬家全面 come back，不過劇中女友朱慧敏，巢已離好難有得再出現。《蘋果日報》圖片
真面目
唔斷氣 《愛．回家》 1,000集收檔 馬壯全家輪迴亂入新處境劇
《愛•回家》第二輯播咗超過 100集，收視唔掂，要馬家 come back救亡，雖然未全面回歸，但馬家回家消息一出，即令網友重燃追睇嘅熱情，據知《愛•回家》播到 1000集就會玩完，但大台高層終留意到呢班馬家嘅威力，於是決定三月開新處境劇時，即使由黎耀祥、毛舜筠、陳國邦孭飛，但都預馬家成員參與，實行換個名又再見面，好似投胎轉世一樣，同一班人無限 loop囉！
第二輯《愛•回家》原本踢走馬家，諗住捧張振朗、坤哥等人上位，可惜收視未如理想，最慘師奶同巴打只想睇馬家，令第二輯口碑都仆直，惟有上月底開始揾番馬家回巢救亡，收視未知點，但起碼巴打重新關注。不過據知《愛•回家》 1000集（只餘 60幾集）就再見，新處境劇亦度緊劇本。
曹總回歸
新處境劇暫以《畢打自己人》做藍本，主角為黎耀祥、毛舜筠、陳國邦等，但大台高層今次見到馬家喺處境劇嘅威力，決定再借馬家幫手，當然唔係馬家人物原名過底到新劇，而係將黎諾懿，劉丹、林漪娸、郭少芸等，以另一角色出現喺新劇，等《愛•回家》觀眾因為呢班馬家演員而 Keep住睇新劇。
現忙《 ICAC 2016》嘅黎諾懿話：「暫時未收到通知，因為呢輯《愛•回家》都要拍到 3月，一星期都要開三日工，我諗大概 1000集就完喇！其實律師樓嘅嚴謹呀，網友最 like嘅曹總都會返嚟㗎，但我同朱慧敏嗰段就未見到，大家繼續留意啦。」又係呢班演員玩晒，不如溝埋做《回家打自己人》
衰啲乜？
《愛．回家》第二輯冇人睇，原因一個字：悶！雖然有黃翠如、張繼聰打頭陣，不過劇情真係就算連師奶都頂唔順，而且想捧嘅新一代張振朗同何君誠又未入屋，冇人睇冇人講是常識吧！
未入屋
對師奶嚟講，張振朗只係扮張智霖好似嗰個，何君誠直頭不知他是誰，叫人點睇啫？（網上圖片）
採訪、撰文：娛樂組
|
鍾意就快D Share啦！
|
|
|
