為咗頭家，康華努力北上拍劇搵人仔，不過歲月冇催殘佢喎，仲點睇都唔似 44歲添！
封面
大台捱足 13年 養 80歲病母 44歲康華窮到食隔夜飯盒
啱啱播完大結局嘅古裝劇《刀下留人》，喺大家都無乜期望之下，又竟然令大家有啲驚喜，仲令復出拍港劇嘅康華萬貴妃彈起咗添！
94年選港姐出身嘅康華直至 07年離巢期間，捱足多年連女二都未做過，人工有幾多可想而知！要獨力養起成頭家，照顧 80歲患病雙親的康華，當年仲試過喺劇組放飯期間偷偷攞多個飯盒留來下餐食，康華諗起都心酸。「我係最主要照顧我爹哋媽咪嘅人，好慘淡㗎！」
與譚小環同屆選港姐，如今譚小環都要賣魚蛋時，乜獎都無的康華難道會風光過冠軍港姐？其實康華 07年已經正式離巢， 12年先再同大台簽部頭約，家陣主力返大陸搵人仔。
慳錢偷飯盒
「嗰陣時渾渾噩噩，參加咗香港小姐之後跟住就有監製搵喇，又唔識得珍惜，又唔識得去表現自己嘅！嗰時唔識諗，無乜腦㗎！人哋派咩工作俾我就做囉！」主持綜藝節目《花弗新世界》二年後就被調到戲劇組拍劇。拍足 13年劇，康華一直當不成花旦，收入不高，惟有各方面慳錢。
「要返多幾份工啦，夜晚入廠都要同佢哋度時間去教跳舞，賺嘅錢返嚟都交晒告票（泊車抄牌），盡量食飯盒囉！一個劇組有時有人唔食會多咗出嚟，我就會攞返屋企當晚餐囉！偷多一個囉……如果我早 10年整靚啲個樣，可能會發展得更加好！我成日覺得我唔夠靚，唔靚女，或者唔得囉，所以咪唔得囉！ 44歲先得囉！好過無囉！我不嬲都默默耕耘，我又唔想用其他途徑得到人哋注意，我想好踏實咁好好哋去做一個演員。做戲，我係鍾意，真係好鍾意，所以我好俾心機。雖然𠵱家遲咗少少，但係都好過無」
離巢做女主角
拍足 13年劇都等不到上位機會， 07年康華收到大陸一個女主角劇本，剛好同年與大台約滿，康華決定搏一鋪，不過自己一個返大陸又確係好難捱。「我試過喺哈爾濱，零下四十幾度嘅地方，我貼晒成身暖包，着咗 13件衫， 6條棉褲，啲雪去到膝頭以上，行都要自己搬起隻腳，仲生晒凍瘡，住嘅環境好差，住軍人嘅軍營，全部人都唔識，有其他演員家底好，話頂唔住就走，我就咬緊牙根都要過埋呢啲關口。」
到 12年樂易玲親自出面與康華傾回巢合約。「係樂小姐同我傾番嚟呢份合約。佢俾好大自由度我，要好多謝佢。佢話『好多嘢都可以配合，你自己考慮，如果做到咪做囉！』呢啲機會好少有！」
多謝高登先
多年辛苦搵錢，康華主要想令已年過 80的雙親過得好一點，但可惜北上卻令自己少了與父母相處時間。
「我係最主要照顧我爹哋媽咪嘅人，好慘淡㗎！我啲親戚都話，你真係好喇，搵埋搵埋咁多送俾醫生，下次我做醫生呀！媽咪心臟有事，咁有時做 body check，好貴㗎！所以我先多啲留喺香港拍嘢，照顧佢哋。」
原來康媽媽近年因心臟有事，已多次出入醫院，最近一次康華返港，見媽咪足足瘦了 30磅，更幾乎認不出媽咪，更令康華想多留時間在港。
今次《刀下留人》成功令康華彈出，康華千叮囑萬叮囑要多謝高登和公司，「首先要多謝高登嘅巴打絲打們，俾咗呢個『最正貴妃』嘅名我！到𠵱家為止我最鍾意都係《刀下留人》呢個角色，因為有得發揮嘛！我覺得我喺大陸做咗咁耐，原來我喺情感呢方面嘅發揮係比較擅長，喺香港比較少呢個機會，所以今次好多謝監製羅鎮岳同埋編審冼翠貞，好感激呢兩位伯樂。」
康華最後仲話其實佢想做正派角色多啲，大台想留住康華個人同個心，識做
吸收小鮮肉
《刀下留人》入面，張景淳飾演皇上好冧康華，原來戲外康華都寧舍吸引小鮮肉喎！
「𠵱家無拍拖，不過都有追求者，但係個個都細過我㗎！廿零歲咁囉！初時唔知㗎，到後尾識咗時傾偈佢哋至知，我會同佢哋講『姐姐唔啱你㗎！』都幾好笑！」
其實康華保養得咁好，點睇都唔似 44歲，連佢自己都話：「我知道自己過咗 40歲，不過唔係你哋大字標題寫我 44歲，我真係唔記得呀！」
唔怕冇拖拍
康華出道至今都冇同圈中人傳過緋聞，反而 05-07年期間就被影過同二位男士過從甚密。不過咁，康華話自己已經過咗想拍拖、結婚嘅年紀，一切隨緣喎！
知心閨蜜
康華在大台捱足十幾年，好朋友唔多，但知心姊妹總有幾位嘅！睇吓康華點講
羅敏莊
原本唱歌出身， 98年開始入大台拍劇，至 13年拍完《貓屎媽媽》後便離開大台，咁多年未做過女一更加冇乜邊套令人有深印象，家陣離開大台專心相夫（陳國邦）教女（ 3歲陳禛），間中出下發燒碟唱下歌，好過在大台捱。
劉玉翠
90年藝訓班畢業後便簽約大台，開頭頗受重用，亦試過憑《愛情全保》獲提名最佳女配角，可惜之後劉玉翠在大台角色愈演愈可有可冇，至 11年約滿大台後心淡走人改簽 HKTV，可惜 HKTV又開唔成台。黑仔劉玉翠家陣在大陸發展，即使大台曾力邀回巢，但劉玉翠仍拒絕食回頭草。
唐寧
81年出世的唐寧， 92年便入大台做童星，至 02年開始正式加入大台拍劇，曾在《戀愛自由式》做過女二，曾多次提名飛躍進步女藝員可惜次次冇份。 10年跟舞台劇導演鄧偉傑結婚，並誕下兩女， 15年拍完 HKTV《歲月樓情》後，還未有新劇開工，專心湊女。
採訪、撰文：娛樂組
攝影：林迅景
化妝、髮型： Meegan@Brighten Up
形象： Bryan@the Flaming
服裝： MZJJ
場地： H.ours Bar& Restaurant太子店
|
鍾意就快D Share啦！
|
|
|
