柏豪新春拜訪未來外母
周柏豪日前被本報獨家拍得面燶燶與圈外女友撐枱腳食雞煲，昨日他與連詩雅出席活動時解釋因頸痛致冇心機兼黑面，更被建議不要做刺激運動，他卻揚言與女友感情如新歌《相安無事》般好，更預告會向未來外母拜年！ 文：音樂組 攝：林蔚恩
與Shiga即席揮毫的柏豪以「相安無事」交代與女友的感情，順便力Sell新歌。
日前與女友撐枱腳的柏豪，全程悶悶不樂。
柏豪（左）與Shiga（右）一同參與「無煙夢片場」起動禮。
周柏豪與連詩雅（Shiga）昨日出席apm舉行的「無煙夢片場」起動禮活動，對於被本報影到黑面與女友Stephanie撐枱腳，柏豪解釋去年因打籃球整傷頸，近日翻發搞到冇心機，問到女友當時可有安慰他？柏豪說：「冇唔開心，頸痛正常都會面黑今日好番好多，尋日睇咗醫生。」隨即力推自己歌曲：「相安無事！」
Shiga男友唔陪跑
柏豪又指醫生建議他近三個月不要做刺激運動，記者隨即叮囑別跟女友做劇烈運動，柏豪笑笑口點頭說：「冇回應。」
至於曾到挪威跑馬拉松的Shiga表示，無緣出戰明日舉行的馬拉松比賽：「冇報名，因為當時喺挪威跑緊半馬，之後整傷腳，驚康復唔切。」她透露現時仍有Keep住跑步：「係心癮，依家膝頭好番少少，開始跑番，但一痛就會停。」問到是否與圈外富二代男友一齊跑？她說：「通常朝早一個人跑，好多人都返緊工。」
新年將至，兩人聲言有幾日假，Shiga說：「會陪多啲屋企人，之前屋企發生咗開心同唔開心事，有親人離開，加上媽咪將飛歐洲工作，佢忙過我，約佢食飯要Book定。（同未來奶奶拜年？）都係陪屋企人。」柏豪則大方透露會到未來外母家拜年：「成日拜訪，冇乜特別！」
與Shiga即席揮毫的柏豪以「相安無事」交代與女友的感情，順便力Sell新歌。
日前與女友撐枱腳的柏豪，全程悶悶不樂。
柏豪（左）與Shiga（右）一同參與「無煙夢片場」起動禮。
|
鍾意就快D Share啦！
|
|
|
