孫耀威猴年娶妻 計劃領養
孫耀威（Eric）昨日出席慈善活動，與女友陳美詩（Macy）拍拖六年多的他，被追問何時結束愛情長跑，Eric漏口風表示今年有機會迎娶Macy：「會開行turbo！」談到生B，Eric透露跟Macy有共識有意領養小孩：「領養唔再係天方夜譚嘅事，生兩個（小孩），領養一個都可以。」
歌手孫耀威昨日以大使身份現身維園出席慈善活動，見在場有眾多小朋友，Eric即父愛大發，與小朋友拍照留念。Eric受訪時被問拜年時可有被親戚催婚？他笑謂：「開始冇催，都覺得冇乜用。」Eric指結婚對他來說是為生下一代，近年都有留意內地助養及領養兒童的計劃，他到內地山區探訪時，都為小朋友於較差環境成長而感心痛。不過，Eric指因家人思想較傳統，加上自己又是長子，所以家人未必贊成他領養小孩，但覺得他們最終會支持。
探孤兒思想改變
Eric與陳美詩拍拖六年多，問他何時拉埋天窗？他漏口風說今年有機會娶Macy：「會開行turbo，依家年頭啫，仲有好多個月，好多嘢會發生。（求婚未？）唔使（口架）喇，傳過電郵、WhatsApp就得！」Eric說與Macy都很喜歡小朋友，故很贊成領養，不過知道Macy都會想生B。
記者昨日再致電Eric問他有關考慮領養小孩一事，他表示近年受好友鄺文珣影響，經常探訪孤兒院，更覺得肯助養及領養小孩的人很偉大：「我一直想生三個，但覺得唔使三個都自己生晒，香港人有錢有能力，生兩個，領養一個都可以。我哋呢輩唔係將傳宗接代睇得咁重，領養係件唔錯嘅事。」Eric坦言自從到訪山區親眼看到很多病童因沒錢醫病而走向死亡邊緣後，就開始有領養小孩的想法。記者提到領養要負很大責任，Eric直言跟Macy有共識：「領養唔再係天方夜譚嘅事，探訪得多思想都有所改變。」問如何說服家人？Eric說未將領養的想法告知家人，並覺得要對自己人生負責，亦知道家人最終會支持他。Macy亦透過電話表示跟Eric都覺得領養很有意義，所以很支持：「希望有更多孤兒可以有個家，喚起更多人關顧孤兒同有需要嘅小朋友。」
大頭蝦女友諒解
另外，昨日活動中問Eric怎樣慶祝情人節？他指因女友本月22日生日，所以忘記了情人節，還約了一班老友食飯，更自認衰仔：「諗住佢生日送222支玫瑰畀佢，做啲好老套（口既）嘢，所以唔記得咗情人節。（有冇推咗啲朋友？）佢就好好（口既），話我已經約晒，好諒解我！」
文：音樂組
攝：劉智源
|
鍾意就快D Share啦！
|
|
|