猴女祖兒結婚沖喜?龍仔努力
猴女容祖兒農曆年廿九實行賭枱上迎新歲，大發新年財，寓意來年事業暢旺。踏入娛樂圈第17年，她決定親自炮製音樂會，再孖李克勤「合體」行善。至於本命年沖太歲，會否當「猴年新娘」沖喜？祖兒將主動權交給男友劉浩龍：「咁要條龍仔努力」文：音樂組 攝：司徒國榮
肖猴的祖兒被問到會否做猴年新娘沖喜，她表示叫男友劉浩龍努力。
祖兒每年除夕晚，都與同事到老闆楊受成家中開賭局迎新歲。
入行17年的祖兒計劃開免費音樂會，冇賣飛壓力，可作大膽嘗試。
容祖兒今年農曆新年只得大年初一及初二留港，隨即飛到美國拉斯維加斯與李克勤做騷兼度新歲。她表示適逢當地舉行格林美頒獎禮，正努力撲飛，希望入場一睹盛事。至於男友劉浩龍會否相伴？她笑說：「睇吓有冇機位」
雖然新年僅得兩日在港，但祖兒稱近年除夕晚，都會大夥兒赴老闆楊受成家中開賭局迎新歲，問到可有發新年財？她笑說：「通常都係老闆贏，佢係大莊家嘛！但我都試過贏少少，都好開心！（落重注？）我好神經質，可以忍十幾鋪唔買，然後突然冇邏輯咁落注，大家一齊嗌！平時喺楊生面前邊敢咁癲？個個雙手放後，但嗰晚個個都冇晒儀態囉！玩到咁上下，啲姐姐就會煎蘿蔔糕、年糕、湯圓畀大家食，祝願新一年步步高陞，團團圓圓。」
初一（扌豆）老闆利是
祖兒透露當踏入大年初一，現場的Uncle、Auntie和老闆都會派利是：「佢換埋財神衫，掛埋長鬚出嚟派添呀！講笑啫！但真係好高興，好熱鬧，似一家人咁，之後就會出後花園傾偈、大合照。（趁機同老闆講新年願望？）梗係佢嗰刻最順攤，乜都話好。」祖兒指今年初有好開始，頒獎禮有好成績，記得去年底許願想2016年有新嘗試：「因為已經踏入娛樂圈第17個年頭，都想衝擊吓，果然上天好似聽到我嘅呼喚，嚟緊工作都好有刺激同挑戰性。」
祖兒公布其中一個計劃是開音樂會：「我腦入面已經有一個構思，因為唔收錢，冇賣飛壓力，可以更大膽嘗試。」她感謝克勤令她變得很有計劃，問到兩人合體可有新搞作？她說：「有提議一齊搞慈善嘢，因為我哋形象都唔錯，喺社會得到唔少認同、支持，如果攜手做一件事可以幫到人，更有意義。」
開口夾着脷
肖猴、快36歲的祖兒正是本命年沖太歲，問到如何化解？她說：「以靜制動！聽講36歲同60歲係最犯，最難過係呢兩年，所以會小心啲唔講錯嘢，我會搣大髀囉！（成日開口夾着脷？）係呀！同埋愈小心愈弊，有時講咗都唔知錯，見你哋笑就知又衰咗。」又稱相士指她今年筋骨易受損，故跳舞盡量不要大動作。談及最好的化解方法是結婚沖喜？祖兒開心笑說：「我唔知呀！希望條龍仔（劉浩龍）努力」
肖猴的祖兒被問到會否做猴年新娘沖喜，她表示叫男友劉浩龍努力。
祖兒每年除夕晚，都與同事到老闆楊受成家中開賭局迎新歲。
入行17年的祖兒計劃開免費音樂會，冇賣飛壓力，可作大膽嘗試。
|
鍾意就快D Share啦！
|
|
|