張穎康同老婆麥雅緻湊住囡囡喺西貢放狗，一家有講有笑，張穎康頂得住。
真面目
頂硬上 麥雅緻冇得撈《東張》 張穎康孭起全家：等我捱
大台節目《東張西望》 1月大換血，獨攬大權嘅余詠珊又再出招，踢走老臣子麥雅緻同陳倩揚，換入有線幫李潤庭，連同之前已霸緊地盤嘅陳貝兒同區永權，有線版圖成功伸延到《東張》。
本來做《東張》保持每月穩定有 3至 4萬收入，但上月麥雅緻突然被調離肥水位，老公張穎康即刻要孭起成頭家，養老婆同一歲女，日夜趕劇趕到氣咳，他回應時無奈講句：「等我捱」
麥雅緻被調離《東張西望》後，老公張穎康自然要孭起全家。週一（ 1日）兩公婆同囡囡喺西貢放狗，一家表面樂也融融，之但係兩公婆似滿懷心事，縱使同囡囡玩都未有開懷大笑；之後喺附近茶餐廳吃個普通午餐就算，慳得就慳。
一週 9騷變冇嘢撈
港姐出身嘅麥雅緻，以往每星期都主持 5日《東張》及 2日《創富坊》，由於《創富坊》節目時間長，每集計兩個騷，故此麥雅緻每星期多達 9個騷，月薪有 3、 4萬；但冇咗《東張》後，據知農曆年後《創富坊》亦將會摺埋，換言之麥雅緻將會變零收入，唔怪得同老公張穎康都咁愁。
失去穩定收入，老公張穎康惟有努力拍劇兼𢱑撈填補，好在他亦算劇接劇維持收入，但對於老婆被離職，張穎康戥老婆唔抵：「佢好勤力，每次入廠都刀仔拮大髀嗰隻，唔可以錯，到知道冇得做，佢好唔開心，但唔捨得多啲；我哋兩公婆成日分享一樣嘢，一道門閂咗，另一度門會開，前面嘅路唔諗住，開開心心先囉！」
張穎康話老婆連《創富坊》都冇得做之後收入會更少，但好彩有積蓄唔太擔心。問到老婆會唔會轉去拍劇，佢就話：「身為一個老公，如果我喺度捱緊（拍劇）嘅時候，我知道好辛苦，如果老婆要拍劇，啲角色唔好，我唔想佢捱呢個階段，不如唔好做；我唔係好想老婆由頭捱起，等我捱我捱冇所謂，又可以學下嘢！」
麥雅緻亦話暫時唔擔心住：「我接開啲 MC工作，雖然收入冇以前咁穩定，但都可以嘅！」希望大台可以珍惜下啲有 heart嘅藝人
新《東張》主持冇個識
《東張西望》由 1月起大換血，踢走陳倩揚同麥雅緻後，加入有線幫李潤庭、港姐李曉東以及補習天王林溥來，觀眾受唔受落就要放長雙眼，不過維穩騷呢家嘢，邊個做都一樣
採訪、撰文：娛樂組
攝影：攝影組
|
鍾意就快D Share啦！
|
|
|
