熱爆娛樂: Coffee馬爾代夫開波教瑜伽 [壹週刊

2016年3月10日星期四

Coffee馬爾代夫開波教瑜伽 [壹週刊 - 1357] __,Coffee,林芊妤,M1,

娛樂偵訊

Coffee馬爾代夫開波教瑜伽

林芊妤 Coffee俾大台請走後，兩年來教瑜伽搵食，學費由每堂 1,000加到 2,000元，加埋 24小時 on call，收入好過做藝人多多聲，去年購入價值 800萬單位做埋業主，要供樓又要搵裝修費， Coffee連去馬爾代夫旅行都顧住搵錢，著三點式開班教瑜伽。

學費加倍

離開無綫後，有牌夠資格做導師的 Coffee索性教瑜伽搵食，試過在人流多的旺角當街做示範谷宣傳，又膽粗粗上門教授，又搏又勤力！密搵兩年，去年終於成功上車，跟屋企人夾份買樓做業主，孭住層樓， Coffee學費加一倍，變二千蚊一堂。

「屋企人俾首期，我只係負責供樓，等而家住緊個單位租約滿，我就搬返去同屋企人一齊住，將租樓嘅錢用嚟供樓，加埋使費，一個月都要三萬幾蚊。另外又要裝修，雖然已經搵咗相熟師傅去做，但都要二十幾萬，所以要努力啲開班賺錢。」 Coffee說。

帶齊瑜伽裝備去旅行，可知 Coffee的熱愛程度。

游游下水都突然做瑜伽。

Coffee說難度超高的蜘蛛式甫士並不是瑜伽動作，只係一時貪玩。

每次外遊， Coffee都會在異地擺瑜伽 post影相留念，挑戰難度兼宣傳。

額外服務

收二千元一對一授課的 Coffee，自稱好使好用，早前她讀了個營養師課程，為學生提供額外服務。

「啲女同學會打電話嚟問我邊啲嘢啱佢哋食，我又會幫佢哋計卡路里，廿四小時熱線，幾夜都會答，所以好多學生跟咗我兩年都繼續。個別教授好處在於我可以好全面咁去 care佢哋，譬如有學生腳痛或者手痛，我會教佢哋做一啲動作幫助復元，我仲包埋場地，所以計起上嚟都唔算貴。另外有啲學生會 group埋一齊上堂，拉勻都係幾百蚊一個。」

Coffee早前同朋友去馬爾代夫旅行，竟然有意外收穫。

「喺馬爾代夫玩嗰段時間我日日如常做瑜伽，啲朋友見到有興趣，所以就响當地叫我開班教佢哋，又話會俾番學費我，有得玩又有錢賺，一舉兩得！」 Coffee說。