鄧麗欣(Stephy)同方力申嘅十年童話幻滅，另一餅碎女楊愛瑾(Miki)就力抗七年之癢，正式入紙同拍拖七年嘅永安太子郭永淳結婚。今日本報喺香港婚姻登記署發現，Miki同郭永淳係上個月31日，已入紙排期，然而兩人並未喺擬結婚通知書上填上任何職業，但兩個人嘅通訊地址就一樣。Miki回應說:「多謝關心！一般程序到適當時候再同大家分享。」之後追問佢會唔會喺香港擺酒，同會唔會叫幾個老友(Stephy、Kary同區文詩)做姊妹？佢就Whatsapp留言回覆話：「遲啲再講」跟手再補兩隻掩住口嘅馬騮公仔。吳雨霏(Kary)被問到送甚麼禮物給Miki？佢透過短訊回覆：「未諗啊！祝福兩位白頭到老，相親相愛，快點生bb。」消息指兩人將於6月先在香港擺酒，之後再到外地舉行西式婚宴，Kary、區文詩同媒人側田都會出席，區文詩昨在電話說：「我哋冇乜嘢要負責，佢又冇姐妺團，我哋人到就得。」剛分手的鄧麗欣透過短訊回覆，將會出席Miki嘅婚禮：「祝佢哋幸福快樂！」今年31歲嘅Miki早在今年2月元宵佳節嘅時候，就公佈咗今年6月會同郭永淳結婚。其實佢哋呢段愛情，真係飽歷風雨。二人認識初期，礙於男方有老婆伍智恆，一度令Miki背上第三者之罪名，二人相戀7年，終於排除萬難，修成正果，喺去年Miki生日，郭永淳帶佢到冰島和芬蘭睇北極光，喺芬蘭嘅漫天風雪下跪求婚成功。上月31日，佢哋正式入紙申請結婚，認真值得恭賀。
|
鍾意就快D Share啦！
|
|
|
