ViuTV《晚吹》變態酷刑 露股打藤夾乳頭
ViuTV深宵節目《晚吹─真PK》繼首集主持Kevin Boy受酷刑含林雪臭襪和舔大隻佬胳肋底後，前晚播出第二集再挑戰電視尺度，Kevin Boy鏡頭前除褲露股，繼而再與另一主持火火玩夾乳頭互扯，內容大膽令觀眾咋舌。有人質疑節目教壞人，Kevin Boy昨反駁說：「覺得教壞人可以唔睇，呢個係一個選擇，唔係逼你睇。」
（酷刑指數：★★★★★為最高）
■Kevin Boy（右）與火火接受大懲罰，二人被木夾夾住乳頭，再後退互扯。電視圖片
【乳頭拔河】酷刑指數：★★★★★
玩破格的ViuTV主打真人騷， 原來連深宵節目《晚吹─真PK》一樣有睇頭。《真PK》由網上節目《情義兩難全之玩爆你個腎》的爆腎主腦李健宏（Kevin Boy），以及電影《老笠》導演李家榮（火火）擔任主持，節目玩法是若主持未能成功令嘉賓答中暗題，該主持便要接受懲罰。首集嘉賓林雪除粗口橫飛外，Kevin Boy更因為輸掉而被罰舔大隻佬胳肋底及含住林雪臭襪，核突搞笑程度爆燈。
前晚第二集由郭偉亮（Eric Kwok）擔任嘉賓，玩得更大膽出位，Kevin Boy再輸而被大隻佬脫下褲子用藤條打屁股，初時Kevin Boy只露出股隙，惟Eric Kwok查看其傷勢時，Kevin Boy索性除褲露出整個屁股，完全挑戰電視尺度！最後兩位主持接受大懲罰，被大隻佬用木夾夾住乳頭，然後退後互扯，內容可謂三級變態！
ViuTV昨被問可會違反免費電視守則？發言人王小姐說：「因為節目喺晚上11點45分時段出街，我哋亦PG（家長指引）咗，所以可以出街。另外我哋重點在於懲罰，同增加趣味，完全冇賣弄污穢嘅成份。」
玩都要玩得認真對於除褲露股，Kevin Boy昨在電話中說：「呢個節目係香港電視一啲大膽嘅新嘗試，我玩都要玩得認真啲。」難道不覺過火？他說：「嗰一刻冇諗，我做完個懲罰真係痛，Eric Kwok質疑我，我好自然地講『X！我嗰吓真係俾人打X咗㗎，畀你睇喇！』」可擔心節目遭禁播？他說：「唔到我話驚唔驚，每次返去錄影我係盡情投入，希望唔好咁快禁播。」有人質疑節目教壞人，Kevin Boy反駁說：「未必人人接受到，但起碼有個選擇畀人，覺得教壞人可以唔睇，呢個係一個選擇，唔係逼你睇，如覺得唔舒服，可以選擇轉台，每個人口味都唔同。」
Eric Kwok昨日亦大讚節目有膽識、夠癲及有創意，他說：「可以畀香港人輕鬆吓，我覺得唔錯。今時今日嘅細路冇咁容易俾人教壞嘅，相比喺網上可以睇到嘅嘢，呢個節目算好檢點。節目嘅尺度更加可以顯出香港言論自由，有咁嘅自由，唔好嘥。」
採訪：魯吉、嵐山、皓騫
■Kevin Boy要被大隻佬除褲打屁股。電視圖片
【藤條打屁股】酷刑指數：★★★★
【越痛越玩】十大酷刑起雞皮《晚吹─真PK》用盡各種變態、核突、惡頂、痛楚等十大酷刑懲罰兩位主持Kevin Boy和火火，連嘉賓林雪揚言「睇到起雞皮」。
【墨汁撈納豆】
酷刑指數：★★★
【飲老鼠酒連老鼠】
酷刑指數：★★★
【大隻佬狂吻】
酷刑指數：★★
【腋下起重機】酷刑指數：★★★★
【鹹苦胳肋底】
酷刑指數：★★★★
【廁所泵奶奶】
酷刑指數：★★
【請襪進口】
酷刑指數：★★★★
【Wasabi粉塞口】酷刑指數：★★★★
|
鍾意就快D Share啦！
|
|
|