小鳳姐發出「尋人啟事」希望搵番當年喺裙底捐出嚟嘅小朋友！
殿堂級歌手徐小鳳將於7月28日至8月2日喺紅館開騷，曾喺紅館創下43場演唱會紀錄嘅小鳳姐，早前嘅演唱會記招上，大會更特別將歷年小鳳姐嘅造型舊照砌成「回憶牆」，小鳳姐見到即開心表示：「估唔到自己試過咁多造型，原來咁勤力㗎。（當年係時裝女王？）睇番啲相又幾潮。」講到巨傘裙同魚尾裙是佢嘅標誌？小鳳姐謂：「少少啦，都習慣咗，平時冇機會着嘛。（着迷你裙出動？）咁我情願跳舞喇！」
當年險「火燒裙底」
提到當年有幕有班小朋友喺佢嘅巨型燈泡裙內「捐」出來時，小鳳姐就自爆87年差啲「火燒裙底」：「嗰次突然之間條裙火燭，好驚好驚，因為係燈泡燃燒咗，啲絲絨裙又好易着火，好危險要即刻台上除，啲觀眾以為我除衫，點知我仲有一條裙。（當時On Show？）係呀，唔除唔得怕『辣』親啲小朋友，係好危險。」
拍片尋童再上紅館
小鳳姐仲話好掛住當年依班「共患難」嘅小朋友，希望隔咗29年仲可以再一齊上紅館舞台！講得出做得到嘅小鳳姐，更專登拍咗條短片「尋童」，小鳳姐喺片中話：「喺當年如果你仲記得喺我大裙底下捐過出嚟嘅小朋友，今日你可能已經長大成人，請你出現喺我今次演唱會舞台上面，我等你哋。」製作仲精心剪咗精彩「捐裙底」一幕，小鳳姐大叫「作動要生！」隨即「捐」出10個穿波點衫嘅小朋友，小朋友仲天真爛漫呻裙底好焗𠻹呀！
來源 source: http://hk.on.cc
|
鍾意就快D Share啦！
|
|
|