離無綫冇包袱上ViuTV爆大鑊 鄧健泓數臭前導演訪問黑工後報警拉人
今年3月離開無綫的鄧健泓，前晚亮相ViuTV《晚吹──總有一隻喺左近》節目，大談「屎忽鬼」話題。沒有大台包袱下，鄧健泓暢所欲言，大爆無綫秘聞，包括自己疑遭兒童節目組「屎忽鬼」出賣，將曾私下分享的感情事向傳媒爆料，又指有「屎忽鬼」導演離開電視台後轉職記者，在荷蘭訪問完黑市勞工後翌日報警，以便直擊警方拉人實況。鄧健泓昨拒絕透露導演身份：「無謂自己做seafood鬼。」
話題十足的ViuTV深宵節目《晚吹》系列，繼周永恒錄影陳淑蘭主持的《總有一隻喺左近》時發難扯火離場後，前晚鄧健泓擔任該節目嘉賓，大爆無綫秘聞。離開無綫兩個月的鄧健泓，在節目中討論「屎忽鬼」話題，自言初入行時發展順利，直至01年離開跟黃柏高簽約做歌手，才第一次感受到甚麼叫「屎忽鬼」。
■離開無綫後的鄧健泓，前晚在ViuTV節目大爆無綫導演轉職記者後惡行，訪問完黑工後報警拉人。電視圖片
■陳淑蘭主持《總有一隻喺左近》，跟鄧健泓大談身邊「屎忽鬼」話題。
鋤D出千鄧健泓表示，他與當時女友原子鏸回家途中，突然有周刊記者拿着大叠照片走到二人面前，指鄧健泓曾追求過相中女子。鄧健泓說：「根本呢啲唔係事實，行姐（陳彥行）喎，同我做過《男親女愛》舞台劇之嘛，咁都話我，仲要我以前喺加拿大一啲感情生活佢哋都知！我開始諗點解有人會知道，乜嘢人想造死我呢，破綻就嚟啦，我可能係喺兒童節目（主持《閃電傳真機》）同某啲人講過呢啲事，我喺加拿大嘅感情生活都有同佢哋分享，嗰時冇諗住娛樂圈係咁恐怖，你問我，我咪講囉，原來呢啲屎忽鬼真係想整死人。」
前晚節目還請來一位前無綫幕後爆料，直指有無綫導演靠關係上位，升上宣傳部主管級後，某日突然走到剪片房偷拍員工攤唞及打機片段，並警告員工說拍下證據扣人工及炒魷，由於該主管昔日任職導演時也經常在剪片房做同樣事情，是以令眾下屬難以信服。
鄧健泓聞言後突然有感而發，大爆無綫一個前導演惡行說：「行內講緊一個人，真係好紅，唔可以講名，應該大家都知，佢真係屎忽中嘅屎忽！我哋電視台有一個導演，以前啲人都覺得佢好縮骨，做嘢唔認真，又成日偷懶，結果佢離開電視台，做一間周刊嘅記者，佢最屎忽嗰樣嘢，係走去荷蘭做黑市勞工嘅專訪，去一間餐廳訪問啲黑市勞工：『辛唔辛苦？你放心，我第二日同你做過，我今日趕時間。』跟住第二日報警拉晒啲黑市勞工，佢就走去影呢個moment，呢啲真係超級屎忽鬼！」鄧健泓指該導演當日在無綫任職時已不受歡迎，他續說：「佢同我哋去一個trip，一個好tough嘅trip，但結果佢屎忽嘅關係好早走咗：『呢啲咁危險嘅嘢我唔做！』鋤大D又出千，講緊唔係賭錢都出千。」
■鄧健泓指早年跟原子鏸拍拖時，被屈跟多位女藝人傳緋聞。資料圖片
■01年鄧健泓離開無綫簽約黃柏高（左）做歌手後，開始遇上屎忽鬼。資料圖片
曾做《城追》記者昨日致電鄧健泓，對於報警拉黑工的前導演身份，他透過WhatsApp說：「過了便算，無謂自己做seafood鬼，唔想影響人。」至於疑出賣他的兒童組同事，鄧健泓只表示是幕後工作人員，其他不再多講。據本報了解，該導演曾參與過《城市追擊》及不少旅遊及綜藝資訊節目，之後曾轉職周刊記者，但據悉五年前已經離職。
採訪：魯吉
|
鍾意就快D Share啦！
|
|
|