阿倫紅酒兄弟情 嗒落有淚
樂壇校長譚詠麟（阿倫）是性情中人，一首唱到街知巷聞的《朋友》便知道阿倫對友情的重視。去年是阿倫入行40周年，身邊一位摯友馬達昌（阿豬）於兩年前早有先機，提議為阿倫推出限量版紅酒慶祝入行40周年大日子，紅酒順利面世之時，摯友卻突然離世，失去如同至親的「兄弟」，令阿倫深受打擊！而這支紅酒正代表着兩人的「半世友情」，回憶與摯友種種往事點滴，硬漢子阿倫面對鏡頭亦難忍男兒淚，更誓要瞓身幫摯友「圓夢」完成最後心願。
在大家眼中一支紀念阿倫入行40周年而推出的紅酒，在阿倫心裏卻有着極深層意義，代表着與故友馬達昌的承諾及夢想，阿倫說：「我認為呢隻酒係一隻『有情有義』嘅酒，嗒落去有味道嘅，同埋係長情嘅酒嚟嘅，希望大家會鍾意！」他更細說推出紅酒的來龍去脈。
圓「阿豬」遺願
阿倫：譚詠麟 記：記者
阿倫：呢個原意係出自我一位好朋友叫馬達昌，係我中學嘅同學，大家好好朋友，男仔叫「打波子打大，玩泥沙玩大」嗰種，甚至佢移民咗澳洲返嚟香港，佢都係住我屋企咁熟嘅！以前佢喺內地做醫療器材投資，近年轉咗型做酒生意，我上年（入行）40周年，兩年前佢提議不如我幫你出隻酒慶祝40周年我哋一路慢慢開始傾，佢唔只幫我做，佢都有幫阿叻（陳百祥）做咗支酒，係我叫佢同阿叻做，我話既然做開，就幫阿叻做先試一試，阿叻嗰隻都好嘢，好受歡迎，酒評方面都好好，跟住就做我呢支喇！不過，中間發生咗件事，發生嘅過程就係……我呢位好同學、好朋友喺舊年年尾過咗身。據我所知因為佢參加一個酒展，就辛苦得滯，嗰幾日係咁應酬，又應酬啲酒商、買家，變咗身體負荷唔到咁重嘅壓力（阿倫開始眼濕濕），暈咗，就咁失救……
記：當時佢唔喺香港出事？
阿倫：（雙眼通紅）佢當時係喺大陸參加一個酒展，就咁過咗身。我同佢太太講，雖然阿豬……我一直叫佢花名阿豬，雖然阿豬過咗身，但我會將佢嘅希望、將佢嘅意願同諗法，係會Carry出嚟，係會繼續……
互送返歸HeHe煙韌
記：阿豬係你圈外朋友中感情最要好？
阿倫：細個我同佢住得好近，佢住丹拿山，我住健康邨，咁我哋放學就猜，贏咗嗰個就喺佢住嗰度嘅巴士站落車，但又咁喎，如果我輸，佢又陪番我行返屋企，而我見佢咁辛苦陪我，我又陪番佢行返去，如是者每次放學又來又回五、六次，中間行嚟行去，你話去到幾無聊呢，男仔做朋友都可以去到咁煙韌嘅！
記：當時接到好朋友呢個噩耗，點樣面對同開解自己呢？
阿倫：佢臨出發去酒展前兩日就喺我屋企食飯……（一度哽咽，未能說出話）……唔……
記：回想起嗰餐飯有冇講過啲特別說話？
阿倫：（雙眼通紅，幾度語塞）咁就……Sorry！Sorry！佢話，佢應承佢老婆，佢希望呢兩年之內做起呢隻酒，令佢老婆生活過得好啲！
酒評攞最高分爭氣
記：遺憾未能與故友雙雙分享成果？
阿倫：（強忍淚水）有啲有啲真係……（哽咽心痛）我最覺得唔抵就係……（眼眶有淚）……Sorry！就係佢享受唔到個成果……（收起悲痛情緒稱讚阿豬）不過，都好，今次佢好爭氣，最近做咗一個Wine Rating（酒評）話呢隻酒非常之好，脫穎而出好高分，喺酒嘅年份各樣，好似酒評家畀到93分，User都畀92分，入面有好多酒嘅，有我嗰隻，有阿叻嗰隻，有廖碧兒嗰隻，又有劉嘉玲嗰隻、姚明、碧咸、再有George Clooney（佐治古尼），呢次佢（阿豬）真係爭氣，唔知係咪在天有靈，贏得好好嘅評語，仲係最高分添！
記：助阿豬完成遺願？
阿倫：希望Carry到佢想法帶出嚟幫到佢嘅太太豬乸。
記：當初係阿豬親身到意大利酒莊挑選？
阿倫：係呀！佢親手揀，我都信佢眼光o架！
記：你有畀意見？
阿倫：我就話阿豬，你啱啱呢幾年先開始做酒，因為酒我都飲咗好多年，意大利酒同法國酒唔一樣，意大利酒個地域性同埋天氣唔同、泥土唔同、葡萄亦唔一樣。而法國酒喺內地都有好多，如果再同人競爭法國酒反為唔好，但意大利酒就啱喇，貨價、年份、酒嘅質量、葡萄各樣呢，做意大利酒反而有市場，而阿豬都好信我，跟住就搵咗呢個意大利酒莊嘅老闆幫我做咗呢隻酒。
相約遊酒莊變「失約」
記： 紅酒反應好，更被酒評家推崇，可令你有信心再推出新酒？
阿倫：我自己就冇乜所謂，我就希望阿豬對佢太太嘅承諾係實現到嘅，都變咗幾瞓身幫佢做呢件事。
記： 「Alan Tam 40th Anniversary」紅酒有Golden Label及Silver Label兩款，你覺得邊種適合男士，邊種適合女士？
阿倫：我覺得Golden Label嗰隻係Fruity啲，女仔容易入口啲，問朋友都咁覺得。
記： 點解同ROCCA酒商合作？
阿倫：因為阿豬同佢哋都有合作開，係意大利四大酒莊之一，輪到佢呢代係最叻做生意同埋有誠意嘅，阿豬每年都有去佢酒莊度住同玩，本來係約咗叫我今年一齊去，咁……依家又變咗酒莊老闆嚟香港見，同埋佢知道今次支酒獲好評，所以我準備開一個祝捷會請佢出席，佢會送番紀念品畀我。
文：音樂組
攝：張福宏、吳文聰
場地：千禧新世界香港酒店
|
鍾意就快D Share啦！
|
|
|