展覽當日，唔使老豆洗米華水喉支援嘅洗米仔周柏豪，落力 sell客，佢個攤位亦好吸客，是場中的旺檔。
娛樂偵訊
拒靠洗米華 洗米仔食腦創業會展擺檔
洗米華（周焯華）食腦成為澳門賭業猛人， 19歲長子洗米仔周柏豪亦實幹，唔靠父蔭，自行創業。日前洗米仔在會展開檔搵客，大學都唔讀便瞓身創業的他，表現落力。
至於老豆是否有經濟支持，周柏豪斬釘截鐵話：「佢（洗米華）愈唔插手，我愈學到嘢。」
曾考慮接手老豆生意
上週四（六月二日）在灣仔會展舉行的網站展覽，十九歲洗米仔周柏豪所設計的新 app「 WOW」也參與其中，對於自己花了大半年時間，一手一腳建立的創業作，洗米仔相當搏命，只要有客走近，他都把握機會，落力 sell。
現場所見，洗米仔的 app檔亦甚為旺場，只要有客到，他都親自上陣，推銷講解。
有個大把錢的老豆，但洗米仔並冇選擇游手好閒的富二代生活，年紀輕輕已有清晰目標。早在前年英國讀書，食腦的他曾與同學創立學生消費折扣 app，並獲當地傳媒報導。去年高中畢業後，他不顧洗米華反對，放棄升讀大學，選擇創業做老闆。
洗米仔花了大半年時間籌備新 app「 WOW」，據知將於七月正式啟動，他亦在公司的 website透露，聲稱曾想過在成熟時候接手家族生意，但細心考慮過後，覺得父親的生意並不適合自己，寧願創業成立公司。
第一桶金二百萬
抗父旨意要做年輕老闆，洗米仔半年前開始為新公司在網上招聘員工，請助理薪金都萬六起跳，出手唔低！不過，創業作的一分一毫，都是動用自己賺到的第一桶金，毋須揼老豆心口。
「柏豪讀書成績唔錯，華哥梗係想佢讀埋大學，但柏豪好有主見，好清楚自己想點，佢同屋企人講，話讀大學根本對佢想做嘅嘢冇咩幫助，所以決定早啲出嚟打江山，攞經驗。
「自己嘅路自己揀，柏豪更冇問老豆攞錢，因為之前佢喺英國搞嘅學生折扣 app，做得好成功，舊年有人出二十萬英鎊（約二百多萬港幣）收購咗，今次佢就係攞住賺咗嘅錢，再搵投資者夾份創業，搵寫字樓請人，所有嘢都係佢自己拎錢出嚟。」知情者說。
親自落場推銷的洗米仔，講到自己盤生意同創業心情，一腔熱誠。問他洗米華有否經濟支持？洗米仔強調不想靠父蔭。
「家人精神上支持就一定，至於經濟，實際上冇乜，佢（洗米華）愈唔幫手，愈俾我空間，我反而學到更多嘢。屋企人一開始係唔支持，因為佢哋想我讀大學，但依家佢俾空間我自己搞，我由冇到有去創作，再自己搵投資者，反而學到更多。」洗米仔說。
創業作搞運動比賽
洗米仔的創業 app「 WOW」，頭炮搞全球首個 online的極限運動比賽。該運動因刺激度高，在外國深受年輕人歡迎，亦因此滿布商機，不少大品牌如 Red Bull都有贊助該類運動比賽。
洗米仔柏豪亦說：「依家搞緊比賽社交平台，係俾有才能（運動）嘅人有機會將自己嘅片放上呢度俾人欣賞，我哋會幫佢聯絡贊助商，好令佢哋嘅才能提升到更專業。」
撰文、攝影、攝錄：娛樂組
|
鍾意就快D Share啦！
|
|
|