何俊仁力排眾議，堅決協助林榮基尋求公道。（鄒潔珊攝）
眾人諸事
瞓身撐林榮基 何俊仁力排眾議
民主黨何俊仁上星期四收到林榮基求助，義不容辭立即伸出援手。部分得知消息嘅民主黨友諗得多啲，擔心民主黨出手會俾外界責難為立法會選舉做騷。仁哥聽咗呢啲聲音冇改變決定，但為咗減低黨友嘅憂慮，特別搵咗同佢一樣唔尋求連任嘅單仲偕幫手，希望封住外界把口。就算搵準備參選嘅黨友求助，例如提供法律意見，都要求對方唔好喺事件中露面。
何俊仁對於為選舉做騷嘅批評話冇乜所謂，因為市民識得判斷，皆因咁多年嚟佢都有做維權嘅工作，更有份成立中國維權律師關注組，三年前嘅斯諾登事件佢都有幫手，林榮基事件唔係第一單。
有葡萄友陰謀論咁話呢件事係中共一手策劃，目的係幫民主黨助選，單仲偕直斥無中生有，林榮基搵仁哥，係因為二人相識一段時間，而且林榮基年過六十歲，可能偏向搵番比較成熟嘅人處理事件，所以對仁哥信任大啲。
TVB補鑊再約訪問 林榮基冇空檔
話說林榮基上週四開記者會爆料， TVB節目《講清講楚》約咗佢星期六朝早做專訪，但點知身處海外嘅「花哥」袁志偉落柯打臨時取消專訪。
原來事件仲有下文。林榮基星期六下晝出席支聯會主辦嘅遊行，唔少記者都同林榮基講想做專訪，包括 TVB前線記者，佢一直好專業咁邀約訪問，仲話第二日可以搵車去接林榮基。
不過，林榮基星期日同星期一嘅訪問時間已經排到好滿，好難俾 TVB插隊。有民主黨中人透露，即使《講清講楚》同午間或晚間新聞係唔同嘅節目，都要被當成同一機構看待先至公平，既然係 TVB主動放棄專訪機會，責任係喺 TVB度，所以都要同嗰位專業嘅前線記者講番聲唔好意思。
鄺葆賢退黨 唔 like青政核心
九龍城黃埔西區議員鄺葆賢本月三日退出傘後本土政黨青年新政，唔少高登仔關注以後佢同游蕙禎仲會唔會拍住上，阿葆話以後會有合作關係。
既然會合作，又點解分道揚鑣？原來近月唔少青政人各散東西，加入其他本土或地區組織。聽聞阿葆舊年選到區議員之後，青政就多咗條規矩，有議席唔可以做核心團隊成員，好多決策都冇份做，所謂制衡權力，選唔到嘅梁頌恆同游蕙禎依家就係核心成員。
有傳阿葆同青政某啲人唔係好夾，早前青政舉行咗內部模擬論壇，傳過有意參選立會嘅梁頌恆表現麻麻，阿葆喺論壇對住佢都幾激動，論壇一完，阿葆乜都唔再講就拉隊走人，氣氛都幾尷尬。阿葆退黨保平安之後，即時有人 spin到佢投共，查實唔少接觸過阿葆嘅人都話佢份人比較合情合理，唔係淨係一面倒謾罵呃 like。
太和邨天價維修 兩代居民齊抗爭
大埔太和邨爆出天價維修工程，三幢樓維修外牆百分之七，價格高達二千七百萬。屋邨星期日舉行特別業主大會，逾千名居民出席，幾百人入唔到學校禮堂會場，法團以人多為理由取消會議。
現場氣氛激烈，唔少居民舉起「黑箱作業」紙牌起哄，甚至有年長男居民衝上台反枱抗議。會議重開日子未定，太和邨管理費加價關注組成員 Cherry話，會積極收集居民簽名，夠百分之五就可以查賬，睇吓有冇人涉貪，又會逼法團申請延遲修葺令，甚至自組人馬參加九月法團改選，以保護邨民利益。
太和邨有唔少長者居民，今次天價維修事件，連平日少理邨務嘅八、九十後居民都忍唔住發聲，關注組就係由佢哋喺網上發起，主要義工有約十五人，其中幾名成員係曾經同法團「開戰」嘅富亨邨關注組成員，分享對抗經驗。
撰文：巫不言
|
鍾意就快D Share啦！
|
|
|