43歲嘅簡珮筠今日喺圓方接受本報訪問，講到被拍檔出賣經過，她稱：「佢好似丁蟹（《大時代》鄭少秋扮演角色）一樣，將歪理變真理。佢話依家上市公司有無限嘅錢，你點同我打官司落去？我覺得世界點可以咁冇公理！」簡珮筠又稱感激結婚4年嘅老公Justin，呢段日子一直陪喺佢身邊，講講下簡珮筠更是眼濕濕：「好感恩！上天賜畀我咁好婚姻，無論開心唔開心，佢都喺我嘅身邊，即使經歷兩次小產，我都好感謝佢，從來冇喺我面前，做過一次表情、講過一句說話，因為佢知道，如果佢表現出唔開心，會令到我更加傷心。佢真係從來都冇。」老公九代單傳，令簡珮筠更感壓力，但對方從不施壓：「我知道佢好愛我，我都會內疚，好似我嘅事業令佢冇咗兩次BB，雖然遇到呢啲又大又難嘅事，我都會安慰自己，每個人有自己故事，哭哭啼啼埋怨係冇用，咬實牙關行過去，回頭望可能只係挫折，我哋互相鼓勵，好感恩老公喺身邊！」
來源 source: http://hk.apple.nextmedia.com
|
鍾意就快D Share啦！
|
|
|