8:30pm
攤牌後氣氛變得愈來愈緊張，麥明詩開始不斷流眼淚，兼不停用紙巾抹眼淚，騰晒林作則扮鎮定。
娛頭
獨家直擊攤牌 林作震騰箍煲 麥明詩爆喊兩粒鐘
當麥明詩在深圳趕拍無綫新劇《賭城群英會》時，大狀男友林作卻在香港與「 A貨麥明詩」、同是牛津畢業的大狀 Victoria夜蒲斷正，正印嬲嬲豬，令超過兩年的感情危
危乎！
上週五（ 17/6），林作同麥明詩見面食飯箍煲，女友由頭喊到尾，足足兩粒鐘，此情此景，林作都冇信心，對於能否挽回？也只能說：「五五波。」
重溫初次約會
林作跟同校同窗余穎洋（ Victoria）銅鑼灣夜蒲，又在對方的 facebook留言「愛上了……不過太遲」給對方，激到正印麥明詩拒聽電話，將他打入冷宮。
拍完劇，女友終於有空檔返港，林作立即「做嘢」，氹掂麥明詩外出見面。
上週五晚（六月十七日），林作專登同女友到第一次約會的法國餐廳 Upper Modern Bistro食飯，面談謝罪。
透視白恤衫襯牛仔短裙打扮的麥明詩，由林作做司機，接載到上環開餐。
二人坐低後有說有笑，林作稍為說了幾句，已氹得麥明詩眉開眼笑，更怕醜到用餐牌遮面，百分百少女情懷。之後二人點菜，叫了生蠔、鵝肝醬，標準浪漫。
不停飲酒
但點完菜，話題一轉，麥明詩失驚無神激動起來，塊面黑到呢！只見林作努力安撫，但愈解釋，麥明詩愈傷感愈喊。一路喊的麥明詩聽的多說的少，其間又不停飲住白酒，明知要負責揸車做司機的林作，只飲清水。
一餐飯，麥明詩喊足全程，搞到鼻紅紅，但見餐廳愈來愈多人，她努力深呼吸想控制情緒，但眼淚仍繼續決堤。無誇張，喊足兩粒鐘，麥明詩才在林作陪同下離去。
女友喊唔停，箍煲飯尚未成功。
未成功箍煲
林作繼續自喻為「被告」，等女友判決。至於女友點解喊，林作說食飯過程有講到之前同 Victoria的事，當時女友係有嬲，但唔係攤牌，亦冇講分手！
「我當然唔想俾人飛好希望再同佢（麥明詩）溝通。」林
作說。
對於麥明詩為何爆喊，二人是否瀕臨分手，林作說：「我哋兩個私下嘅嘢，冇乜再補充。覺得講太多，我同意網民睇法，使唔使搞咁多新聞出嚟，不如交俾我哋私下
處理。」
被問到和麥明詩現時的關係，他說：「我當我哋處理緊，都冇乜進度可言。（膠着狀態？）我好難俾到睇法，總之需要時間空間自己處理。（繼續氹？）當然」林作說。
林母緊張
林作仍未放棄，控方麥明詩曾向傳媒表示有保留。
「順其自然（林作有冇向你交代？）見到嘅影像很片面，發生乜事都唔知。兩個人一齊講信任，我唔想問太多亦唔想再追究，因為覺得冇意思。」麥明詩說。
情海翻波，其實最緊張是林母，麥明詩未選港姐，林作媽咪已拉攏朋友全包她做美容扮靚靚。未來新抱唔開心，林母公開教訓林作。「我叫個仔要乖，要佢聽話生性！」
劍橋 VS牛津
女友離港拍劇期間，林作被斷正凌晨街頭遇上翻版麥明詩 Victoria，觸發冷戰，這位在牛津法律系畢業的 Victoria都係才女，跟十優麥明詩無論外貌氣質都相似。不過林作表明心跡，表示跟 Victoria只是朋友，絕對唔係鍾意。
麥明詩
•劍橋法律系畢業
•會考獲十優成當屆狀元
•港姐冠軍
余穎洋
•牛津法律系畢業
•去年任終審法院司法助理
•現為執業大律師
鴨王爆「老婆」喊到好陰功
鴨王何浩文（ Dominic）在大台重頭劇跟麥明詩合作，二人扮演夫妻，開工冇耐， Dominic已經老公上身，全撐！先是麥明詩返英國劍橋拍節目特輯，被網民圍插離地，他即撲出來救火，解釋麥明詩只係照稿讀，係專業表現，根本冇離地。
今次跟林作的感情風波，他又再次挺身而出，爆麥明詩知道林作「曳曳」後喊到好陰功。「佢（麥明詩）有同我講，知佢唔開心。」
Dominic說有日開工見麥明詩心情差，他便搵了隻道具戒指氹對方開心，就算外界認為他挑機林作，攝位追十優港姐，他亦唔介意，擺明繼續前進。
撰文、攝影、攝錄：娛樂組
|
鍾意就快D Share啦！
|
|
|