有圖有真相，陳妙瑛真係咁多年都仲咁省鏡，或者咁講，可能仲省鏡過以前。
曾與關詠荷、蔡少芬、宣萱及郭可盈齊齊被封為無綫九十年代末「五大花旦」嘅陳妙瑛，曾經演過無數無綫經典劇，包括《無頭東宮》及《洗冤錄》等。
曾獲世界傑出華人
2005年宣布全面淡出娛樂圈嘅佢，及後轉戰商界，更曾獲美國加州哈姆斯頓大學頒授榮譽博士學位及世界傑出華人獎，認真威威豬。
美腿依然省鏡
除咗係出名嘅女強人，現年43歲嘅陳妙瑛，同好多美魔女一樣，有極強嘅逆齡能力。睇番佢嘅舊照同尋日出活動嘅相嘅對比，陳妙瑛除咗省鏡度不減反增之外，一雙美腿更加係咁多年都Keep得相當好，絕對令人葡萄。
被200磅炸藥炸傷
而陳妙瑛除咗喺事業度顯示到佢強勢嘅一面，原來佢嘅善心亦都超越咗常人。尋日佢出席化妝及髮型大賽頒獎禮嘅時候，就重提當年幫無綫慈善節目表演時被炸傷嘅經歷，雖然講到有唔少後遺，但佢一樣無悔，佢話：「我炸完之後就周身痛，當時喺節目入面用咗200磅嘅炸藥，炸出2000磅嘅力，我戴咗耳塞，所以耳膜冇事，但啲骨就內傷，成日周身痛。其實一開始，無綫建議我着泳衣捉八爪魚，但我唔肯，我想做啲有挑戰性嘅表演，雖然搞到咁，但我無悔。」
頸椎有骨刺
除咗受傷令到陳妙瑛成日周身痛，原來佢近兩年頸椎有七節都有骨刺，仲醫咗成幾年都未好番晒，佢話：「最近開始搵到方法治療，可以喺一年內根治，主要靠中醫同拉筋。」
來源 source: http://hk.on.cc
|
鍾意就快D Share啦！
|
|
|
